Un coalicion por tin diferencia, por tin discusion, hasta por tin conflicto. Pero un pais no por ta goberna permanentemente for di conflicto. Pa parlamentario Eduard Pieters (PPA), loke Aruba ta mirando dentro di actual Gobierno, ta bay mas leu cu un desacuerdo ocasional. Segun Pieters, varios acontecimento ta lanta un pregunta hopi mas preocupante: “Tin suficiente comunicacion, coordinacion y liderazgo dentro di e Gobierno aki, pa tuma e decisionnan grandi pa Aruba? Pueblo no a vota pa partido forma un Gobierno y despues cada un ta hala na su propio banda. Ora bo forma Gobierno, bo responsabilidad ta cu e pais.”
PPA ta cuestiona fuertemente e falta di comunicacion y direccion den coalicion: “Ora e partnernan di Gobierno no por yega na mesa cu otro, ya no ta un problema interno. Ta un problema pa pais!”, Pieters a vocifera.
Ken realmente ta dirigi?
Pieters ta señala e reciente discusion rond di representacion di Aruba como Minister Plenipotenciario como un ehempel di tension interno. Pero pa PPA, e persona of posicion no ta e berdadero historia. E berdadero historia ta funcionamento di Gobierno.
Segun e parlamentario: “Ora e partnernan di coalicion no ta suficientemente alinea, e reunionnan importante no ta conta cu representacion completo y diferencia interno ta bira publico, pueblo tin derecho di puntra: Ken ta coordina? Ken ta tuma liderazgo? Y ken ta garantisa cu interes di Aruba ta prevalece riba interes di partido?”
Salario minimo a bolbe mustra e problema den coalicion
E discusion tocante salario minimo, segun Pieters, a expone e mesun falta di coordinacion. Un decision asina tin consecuencia directo pa poder di compra, costo pa empresa, e prijsnan y economia. Esey ta exigi analisis, dialogo y preparacion. “No por ta na ultimo momento e partnernan di Gobierno ta descubri cu nan no ta riba e mesun pagina.”
Pa Pieters, esey no ta gobernacion. Esey ta reaccion. Aruba no tin tempo pa un Gobierno ocupa cu su mes cada biaha y aki ta unda e problema ta bira serio.
Mientras coalicion ta lucha cu comunicacion interno, Aruba tin decisionnan pendiente riba costo di bida, HOFA, e camindanan, salud publico, hospital y futuro economico di pais. E ciudadano cu ta lucha pa paga supermercado no tin tempo pa conflicto interno di coalicion.
E pashent cu ta depende di un sistema di salud cu mester mehora, tampoco. “Si Gobierno no por comunica riba e temanan cu ta dividi nan internamente, con pueblo por tin confiansa cu nan lo ta uni ora mester tuma e decisionnan dificil pa pais?”, el a señala.
Gobierno no ta un acuerdo pa mantene partido na poder y pa Pieters, aki ta e linea cu no por crusa.
Un coalicion no ta existi solamente pa conserva mayoria den Parlamento. Su motibo di existi ta pa goberna Aruba den harmonia y union. Diferencia politico ta democracia. Pero ora interes partidista, posicion y conflicto interno cuminsa domina, mientras problema di pueblo ta keda ‘on hold’, e coalicion ta perde su berdadero proposito.
“Aruba no mester un Gobierno cu simplemente ta pusha pa keda hunto. Aruba mester un Gobierno cu ta logra goberna hunto”. Y pa Pieters, e pregunta politico awor ta inevitabel: “Si Gobierno mes no por pone su cas na orden, con e ta bay pone Aruba na orde?”
