Eduard Pieters, lider di fraccion di PPA, a cuestiona e dialogo nacional cu gobierno ta menciona tocante aumento di salario minimo. Segun e parlamentario, reunionnan cu gremio comercial y gremio sindical no tabata un dialogo berdadero, pasobra e participantenan no a participa libremente den preparacion di e plan. Pieters a splica cu un dialogo ta rekeri comunicacion di ambos banda. El a indica cu, segun informacion ricibi di representantenan comercial, gobierno a presenta agenda y informacion, a permiti algun pregunta y despues a cera e encuentro. Pa Pieters, esaki no ta suficiente pa papia di consenso.
E lider di PPA a afirma cu no a envolve gremio comercial den formulacion di e plan economico relaciona cu salario minimo. El a cuestiona tambe e rapport di Economisch Bureau Amsterdam, cu segun e, minister Eman a menciona, pero cu Parlamento di Aruba ainda no a ricibi.
Pieters a critica falta di informacion tocante contenido di e plan y su consecuencia pa empleado y empresanan. E ta sigui bisa cu tin un desconexion entre gobierno y gremionan, mientras cu gobierno ta crea impresion cu e partinan ta di acuerdo.
El a enfatisa cu PPA ta sostene aumento di salario minimo y cu su fraccion a ripiti e posicion aki durante tres siman. Sinembargo, e aumento mester sosode di forma responsabel, cu claridad y participacion real di tur sector envolvi. Pieters a conclui cu PPA lo sigui haci pregunta pa informa pueblo y exigi transparencia. No por declara cu tin consenso sin un dialogo efectivo y sin informacion completo tocante e plan di gobierno. El a pidi cu gobierno presenta e documentonan na Parlamento pronto.
Pa mas detaye lesa TREMPAN
