Mai Britten, ex Keurmeester, criado di bestia y presidente di Asociacion di cunukero y cria di bestia, no a laga e trabao atras.
El a conta cu e ta na abattoir frecuentemente, pasobra e tin bestia cu e mes ta cria y mata, por lo menos un 20 carne.Tambe door cu e ta den Asociacion di Cunukeronan, e tin contacto personal na abattoir, frecuentemente cu tur esnan cu ta cria bestia. Sa kico ta nan problemanan y sa ki dificil ta awendia pa cria bestia.
Ta bon mes cu nos a haya poco awasero fin di aña cu tin yerba fresco tur caminda, cu ta baha gasto den cria hooi.Ta mantene toch e bestianan riba maishi, pa asina e bestianan haya carni.Britten ta ripara si cu e ta bahando.
Motibo
E motibo ta cu rond di e tereno cu e criadonan di bestia tin, a bin hopi verkaveling cu ta stroba enormemente cu nan no por soporta criamento di bestia mas. Esey ta pa motibo di holo, otronan pa motibo cu e bestianan ta grita, nan ta yama polis, yama Departamento di Salud Publico. Nan ta bisa pa bay cria na Butucu, cual ta un luga basta aleha.
E criado mester biba eynan pa wak pa e bestianan. Si e criado ta biba otro caminda y bay pa su mañan, conta cu e bestianan a wordo horta.
E otro problema tin, ta e cachonan cu ta cana los y ta yega mata e bestianan. Tin hopi criado di bestia ta disgusta, pasobra awendia polis ta trata e casonan solamente si ta casonan cu a gara e cacho, bo mar’e, pa asina bin wak ta ken ta doño di e cacho, pa haya tur e daño cu el a comete cu e bestianan.
Secura
Tabata tin un temporada cu secura. Aki ta caminda cu a forsa e criadonan pa cumpra hooi. E no ta nada barata. E criadonan mester a importa hooi for di Hulanda y Canada. Y tambe ta depende e cantidad di bestia cu tin. Si duna nan un bulto di hooi, cu ta 40 florin. Y si calcul’e pa 10 dia, ta 400 florin. Pa luna caba e ta yega un 1200 florin na gasto na hooi so.
Plus tin cu cumpra e goat grower, e pelletsnan special pa duna e bestia pa nan haya carni. Pa ora bo mata nan, bo no ta haya un bestia cu ta cuero cu weso so. Bo ta haya bon carni di dje.
Britten a splica tambe cu danki na Dios, nos Arubianonan tin e tradicion ainda, cu nan ta gusta nan plato crioyo, sea ta cabrito stoba, carne stoba, of e soppi. No ta bin bestia di afo mas, dus tur cos ta draai local.
Importacion di bestia
E tempo aya Aruba tabata haya bestia di tanto bestia di Colombia y Venezuela. E tempo aya no tabata tin problema cu e brote cu tin na e paisnan aki. Tabata tin masha poco caso, den casi 40 aña cu Britten a traha na abattoir. E fiebre aftosa, cual sintomanan ta blaar na boca, blaar na pata. E bestianan no por come, nan ta bira flaco y muri. E ta un malesa contagioso. Cabrito y carne ta caba cu tur e bestianan aki riba.
Tambe tabata tin e brote di schroefworm na Colombia y Venezuela. A combati esaki y esey a caba completamente na Aruba.
Pa loke ta importacion di carni, solamente paisnan certifica, importacion di carni ta posibel. Of bo tin cu bay haci excepcion den ley si bo kier trece for di Colombia, manera antes tabata e caso. Carni di Merca y Europa por drenta. Esun di Colombia, si e por drenta basta cu dokternan aki bay keur e planta. Pero tin basta cos cun’e. Tin cu check cu Panamerican Health Organization si e baca di e fincanan ey ta liber di fiebre altosa. Tambe e higiene mester ta bon. E keuring mester ta adecuado. Ta hopi cos tin cu wak prome cu laga e bestianan drenta.
Tradicion ta keda
E tradicion ta keda. Britten ta contento cu esey. Actualmente tur cos ta draai riba carni importa for di Argentina, Brazil, Merca, Dinamarca, Belgica, Hulanda. Pero loke cu ta come cu ta saludabel, y bo sa kico bo ta come. Ta bestianan bon cria, higienicamente mata. Aki tin keuringsdienst cu ta draai tremendamente bon.
