E mundo di rock na Aruba tin su fanbase, aunke cu e no ta mucho exponi, manera e otro generonan di musica. Aruba ta cas di varios banda di rock y Madura, ta un di e bandanan mas conoci, cu tin varios produccion bao di su manga. Pa bin cu un produccion grandi ta dificil, pero no imposibel, segun e cantante, musico, diseñador di moda Marlon Dubero. “Love is Evol” ta e proximo produccion di Madura y Dubero ta splica cu prome cu e aña cera, Madura lo saca e videoclip, rond di 27 of 28 di december proximo.
Madura ta un banda di rock cu varios aña di experiencia. Pa hopi tempo caba Marlon kier a trece su musica dilanti pa esnan cu ta sigui e genero aki. Semper pa haci un produccion grandi e ta dificil. Awor aki Madura ta haciendo e produccion aki posibel hunto cu Danny Croes. E cancion aki ta un lovesong skirbi den un mundo mas pisa, produci den un rock hopi moderno, pero e tin peso.
Marlon ta hopi gradicido cu ora e toca, e por yena e luganan. Su focus semper ta internacional, sin duda. Su experiencianan di toca afo cu bandanan anterior y hunto cu su coleganan di Madura, tur tin experiencia den tocamento internacional. Esey ta nifica cu loke basicamente ta pasando awor aki ta pa trece un producto p’adilanti, y pa manera COVID pasa y bay tour, haci e trabao cu ta haciendo pa e ultimo cuater añanan, buscando asina fanaticonan internacional.
A haya nan zonido den COVID
Pa Madura COVID tabata un experiencia positivo, pasobra nan tabata rondiando nan zonido. COVID a bin aden y a buta tur hende bay reflexiona y pensa kico y con kier bay zona. Tur a sinta hunto y a traha un formula di musica, produci hunto, algo cu Marlon ta hopi contento di dje y ta sigur cu e coleganan di Madura tambe ta contento cu e produccion. Madura ta contento y ta riba un bon direccion.
Marlon Dubero y e mundo di moda
Marlon Dubero no ta un persona desconoci den mundo di moda. E mes ta diseña su propio trahenan ora cu e mester duna un presentacion cu su banda.
Tabata tin un momento cu el a conoce un cabayero yama Tito Bolivar. Hunto cu Danny Croes, el a bay un meeting pa filmacion y eynan Danny y Tito a inspira Marlon pa diseña. Semper Marlon tin su ideanan warda y djis saca afo su buki, dal’e habri y e sa caba kico lo pasa. El a bay di acuerdo cu tur cos. Nan haci nan show di moda y e publico a responde hopi bon na esaki.
Tur esaki ta inspira door di un tragedia. Su mama, kende a fayece tres aña pasa. Apesar cu e tabata algo hopi duro, pero a purba toch di saca algo positivo di dje. Su mama a train’e for di chikito pa un dia e ta un artista. E tabata asina facil pa ehecuta tur su ideanan y letterlijk den menos cu un siman, tur diseño a sosode y a estrene na Art Fashion.
E mes ta curioso kico su mente lo bay traha pa e proximo coleccion. E mes ta wardando kico su mente lo bay dun’e pa e coleccion nobo. E tin mita di dje caba diseña. Pero semper e gusta adapta mas. Marlon a splica cu no ta importa ken, hende homber, hende muhe, mucha. E ta enfoca riba tur hende. Tur caminda Marlon kier bay cu su estilo. E no tin limite.
Kico nos por spera pa 2021
Pa 2021, ta spera shownan live na Aruba pa loke ta trata Madura, Marlon a splica. E ta spera cu mundo haya cura pa COVID, hopi hende ta pasando den duro, incluyendo e mes. E no ta facil. Y hopi hende eyfo ta sufriendo. Ningun hende no por yuda, ta algo cu ta pasando y no tin ningun hende pa culpa, Marlon a enfatisa. Ta un ciclo cu ta pasa cu mundo cada shen aña.
E mes no ta punta dede riba ningun hende. Unico cos cu e ta mira, ta cu e persona cu ta sea banda di dje of leu di dje, si por yuda otro, purba di haci esaki.
Marlon y Madura ta gradici di curason, e team di High Performance, cu ta para su tras y ta kere den su movimentonan internacional den futuro.
