Den conexion cu Oficina di Propiedad Intelectual su celebracion di 30 aña di existencia, cu ta riba diabierna dia 17 di november 2017, OPI ta sacando diferente informacion pa conscientisa comunidad riba e balor di registra e propiedad intelectual. Siguiente informacion a wordo tuma di e fuente: http://www.nu.nl/internet/4193821/aap-krijgt-geen-auteursrecht-selfies.html .
E macaco preto (kuifmakaak) “Naruto”, cu na aña 2011 a saca un cantidad di selfie cu e camara di e fotografo Britanico David Slater, no ta haya Derecho di Autor (Copyrights) riba e potret. Esey e hues federal Mericano William Orrick di e estado di San Francisco a dicta den un caso fecha 7 di januari 2016, cu a keda entama door di PETA (People for the Ethical Treatment of Animals), un organisacion Mericano pa derecho di animalnan.
E fotografo Slater a purba na 2011, pa saca un potret di e macaco preto den e jungla di Sulawesi na Indonesia. E macaco a ranca un di e camaranan for di e fotografo y a cuminsa hunga cu esaki y a saca centenares di potret. Mayoria di e imagennan a fracasa, pero un paar di potret si tabata skerpi y a ser publica den varios revista, corant y website. PETA a haya cu e macaco preto tin derecho riba e selfie, pasobra den e ley Mericano no ta para cu e ‘Derecho di Autor’ ta conta solamente pa hende. E macaco a saca e potret y segun PETA, mescos den caso di hende, e macaco mester haya e derechonan y p’esey ganashi riba e potretnan.
Segun e hues e argumentacion ey ta bay mucho leu. E hues ta sigui elabora cu ta na e Presidente y e Congreso Mericano pa trece cambio den e ley, si tin necesidad pa esaki. “Si nan ta haya cu animalnan mester haya ‘Derecho di Autor’ bou di e constitucion Mericano, nan ta segun mi liber pa haci esaki posibel”. Fotografo Slater ta keda para’riba cu e derechonan ta di dje, pasobra e imagennan tabata posibel pa medio di su camara. Segun e hues e propiedad di e potretnan mester wordo dicta den un caso apart.
No ta prome biaha cu tin desacuerdo riba derecho di imagennan. E ‘US Copyright Office’ a afirma anteriormente cu e ‘Derecho di Autor’ no por wordo adkiri pa obranan cu a ser produci door di animalnan, entre otro e famoso selfie di e macaco Naruto. PETA a reacciona decepciona riba e sentencia aki y a anuncia cu e lo sigui cu e bataya huridico. Segun e activistanan di animalnan, e macaco Naruto tin derecho di autor riba e potret, pasobra no ta poni explicitamente den e ley Mericano cu e derecho di autor ta conta solamente pa hende.
Wikimedia, e organisacion tras di Wikipedia, a tuma e potretnan liber di derecho den su ‘database’. Door cu animalnan no tin derecho di autor, e potretnan ta liber pa ser uza door di tur hende, asina Wikimedia a argumenta.
OPI ta opina cu door cu un animal no ta capaz pa actua pa su mes, manera entre otro duna otro persona permiso pa haci uzo di su potretnan den media, cu ta di gran importancia pa historia y humanidad, un animal no lo por adkiri ‘Derecho di Autor’.
OPI ta extende un caluroso invitacion na publico en general pa pasa diabierna 17 di november 2017, na nos Oficina na Adriaan Lacle 3, p’asina haya informacion y pa celebra hunto cu nos e 30 aña di existencia, ‘Aniversario di Perla’ ‘entre 9’or di mainta y 4’or di atardi.
