“Economia ta un materia hopi sensitivo. Como Gobierno bo tin e responsabilidad pa percura pa un competencia husto y un maneho cu no ta ocasiona shocknan laboral y social,” asina miembro di fraccion di partido AVP y alabes minister di Asuntonan Economico y Comunicacion, Sr. Richard Arends, a declara. Pa forma e fundeshi pa diversifica nos economia, Gabinete Mike Eman a ehecuta un plan di inversion amplio riba tereno di infrastructura, areanan publico como tambe energia. “E plan di inversion aki a resulta den cinco area di oportunidad cu por wordo desaroya a base di tecnologianan limpi, industrianan creativo, logistica y exportacion di conocemento,” e parlamentario a splica.
Awe nos ta testigo di un waf di container ultramoderno na Barcadera; obranan infrastructural di mas grandi cu nos a yega di conoce den e ultimo 30 añanan manera e Green Corridor; un hospital state-of-the-art cu ta forma parti di un economia di conocemento. “E efectonan economico di esakinan ta bisto caba den e prome kwartaal di 2017,” minister Arends a confirma. “Ainda nos ta spera e capitalisacion riba e oportunidadnan di actividadnan nobo den e areanan rond di nos refineria cu awor nos por usa atrobe pa industrianan limpi, construccion di e Watty Vos Boulevard, como tambe e area cla pa wordo desaroya banda di e terminal di pasahero na e waf di Oranjestad.”
“Awe nos ta wak cu e efectonan positivo di e plan di inversion como tambe e esfuersonan dedica di Gabinete Mike Eman den turismo y rehabilitacion di e refineria ta dunando resultado,” minister Arends a declara. Indicadornan di importacion di metalnan y makinaria a mustra un aumento, como tambe entradanan di gobierno cu ta directamente relata na e actividadnan economia. “Indicadornan di esaki manera BBO/BAZV y derechonan di importacion ta mustra un aumento den e prome kwartaal di 2017 publica pa Banco Central di Aruba,” minister Arends a splica.
Fiansanan personal como tambe comercial a mustra un aumento den e prome kwartaal di aña 2017. “Esaki ta confirmacion di e confianza den nos economia y e maneho economico cu a wordo hiba,” e mandatario a bisa. Durante e prome kwartaal di su cargo como minister di Asuntonan Economico, e Business Perception Index a wordo manteni y e Consumer Confidence Index a mustra un mehora. “Esaki sigur ta yena’mi cu satisfaccion y confiansa como cu esaki ta e prome paso pa logra nos metanan riba tereno economico y financiero,” minister Arends a finalisa bisando.
