Frakshon di Movementu Futuro Kòrsou (MFK), a tuma nota di e situashon ku ta reina na e momentonan aki na St. Elisabeth Hospitaal (SEHOS).
SEHOS aktualmente ta konfrontando diferente problema i resientemente inspekshon di salubridat a imponé un di dos sanshon riba e “Raad van Bestuur” (RvB) di SEHOS, debí ku nan no a reakshoná/kumpli ku e promé sanshon. E di dos sanshon ta mara na un but di mil florin pa dia, si SEHOS no kumpli den e periodo ku inspekshon di salubridat a stipulá.
Parlamento a bai di akuerdo pa kada tres luna gobièrnu den moshon di 29 òktober 2013 bin duna Parlamento kuenta i rason riba e trayekto di Hospital Nobo na Otrabanda (HNO), minister nan di turno (Whiteman,Victorina, Jesus-Leitu i Camelia-Römer) no a i ta kumpliendo ku esaki.
Pero pa yega na un hospital nobo, nos no por lubidá ku mester sigui ofresé kuido den e instituto aktual esta SEHOS, pa garantisá ku poblashon por sigui konta ku un kuido médiko responsabel i ta imperativo tambe pa Parlamento sa si e sanshonnan imponé pa inspekshon di salubridat lo afektá e trayekto di transishon pa HNO i si e sanshonan ta na luga pa salvaguardia e kuido na Pueblo di Kòrsou.
Teniendo na kuenta ku SEHOS tin un ròl sumamente importante pa garantisá salubridat i kuido di pashènt, frakshon di MFK ta pidi ku karakter di urgensia un reunion di komishon sentral pa por skucha RvB di SEHOS, Inspekshon di Salubridat i Minister Suzy Camelia-Römer kende ta enkargá ku e kartera di salubridat.
Frakshon di MFK ta spera ku mirando seriedat di e situashon, ku presidente di Parlamento lo yama e reunion aki mas pronto posibel.
