Den cuadro cu luna internacional di orguyo (PRIDE), Cas di Cultura pa su di dos aña consecutivo ta organisa su evento pa e LGBTQIA+ community y Aruba. E idea a bin for di un perspectiva cu Cas di Cultura no ta solamente un teatro, pero un institucion habri pa tur hende y uno inclusivo.
Dia 11 di juni, Cas di Cultura lo presenta PRIDE ON STAGE, cual lo ta un combinacion di un concierto y show. Lo conta cu diferente musico y artista di e comunidad LGBTQIA+ pero tambe diferente artista aliado cu lo presenta cancion hits di pride di diferente epoca. Locual ta haci e evento aki mas unico ainda ta e echo cu pa prome biaha riba escenario di Cas di Cultura varios Drag Queens lo demostra nan talento y asina tambe crea mas conscientisacion di e arte y disciplina aki.
Porta lo habri desde 8:00 pm pa asina tur hende por disfruta di entretenimiento di DJ V y un variacion di cocktails cu lo tin disponibel prome cu e show. Cas di Cultura kier gradici tur sponsor cu a haci e evento aki posibel: Departamento di Cultura, Stichting Orguyo, ClickPrint, Nagico, Magic Orange, Elite, Deep Eddy Vodka, Flex Homes, Gianni’s Group y Boardwalk Boutique Hotel.
Cas di Cultura ta conta cu un propio programacion di nivel halto pa cu e luna di juni, esta e cantante stima Izaline Calister. Dia 5 di juni e lopresenta e obra teatral-musical Eiland van mijn Vader. Carchi ta obtenibel na Cas di Cultura. Pa mas informacion di e variedad di actividad na Cas di Cultura na luna di juni por bishita website www.casdicultura.aw.
