Lotto semper ta purba contribui cu tur federacion, organisacion y/of instancianan deportivo sea cuando esakinan ta den nesecidad di un of mas u nan mester pa por sigui traha na bienestar di e deporte cu nan ta representa.
Recientemente St. Fundacion Lotto pa Deporte a hasi entrega di un check pa cumpra computer na Fundacion Liga Infantil di Futbol di Aruba, LIFIDA cu tabata tin mester di uno pa nan oficina. Awendia ta e tecnologia ta importante y Lifida den e caso aki no kier keda atras y tabata tin mester su computer pa asina nan por sigui traha. Presidente di Fundacion Lotto pa Deporte, Sr. Di Stefano Wernet RA tabata masha contento di por contribui cu LIFIDA pa asina na haya un computer nobo. Manera su persona a bisa; "Lotto no solamente ta contribui cu materiaal di deporte pero tambe cu materiaal di oficina y ta contento cu awor Lifida lo tin su computer".
E aña aki e organisacion di LIFIDA a celebra e hecho cu 30 aña pasa nan a organisa e prome torneo di futbol infantil enconexion cu e celebracion di nos Himno y Bandera 18 di maart. Trinta seleccion nacional di futbol U-13 a bataya den e encuentronan di futbol na nivel internacional relaciona cu e celebracion di e ‘Torneo Internacional Aruba Himno y Bandera 18 Maart’
