Diabierna ultimo bou di un interesa grandi, e temporada nobo di futbol a inicia na Aruba unda a tene un desfile di tur e ekiponan participante na e campeonato 2017 – 2018. Pa prome AVB a inicia nan campeonato di futbol unda a combina e prome wega den Division di Honor entre RCA y Caiquetio cu un desfile di e ekiponan infantil/hubenil participando na e temporada nobo.
Den e ultimo añanan e federacion di futbol AVB a trece diferente cambio den e futbol local. Varios di nan cambionan aki tabata exigencianan stipula pa e federacion mundial di futbol FIFA hunto cu CONCACAF cu ta maneha e futbol den nos region. Tur esaki ta na bienestar di e desaroyo positivo cu kier logra cu e deporte na nivel regional, continental y mundial. Na Aruba futbol ta kedae deporte di mas grandi cu alrededor di 3000 persona prakticando esaki diariamente rond di nos veldnan. E recien presidente re-eligi di AVB, sr. Richard Dijkhoff a hiba palabra na esnan presente unda e tabata masha contento di a haya e confiansa di mayoria di e clubnan na Aruba pa 4 anja mas pa asina sigui traha riba e plan di maneho cu AVB tini pa loke ta e desaroyo di e futbol Arubano. Den e proximo anjanan lokier hiba Aruba su futbol na un otro nivel y lo conta cu e ayudo di tur e partnernan localmente envolvi como tambe ayudo aheno di por ehempel CONCACAF y FIFA sin lubida KNVB di Hulanda.
Lotto, e Loteria di Aruba cu pa varios anja ta un partner di Arubaanse Voetbalbond kier a felicita y alabes desea AVB, tur e 3000 futbolistanan, e clubnan participando na e temporada nobo di futbol,hopi exito. Na e fanaticada di futbol corda sigui duna sosten y apoya bo organisacion faborito esaki den forma sano y den un ambiente positivo. Laga nos tur ban corda riba e slogan “Fair Play” cu mundialmente ta wordo propaganda den e deporte Rey. Tambe e slogan di Alfredo Di Stefano: “No one player is as good as the sum of a team”.
