Diabierna mainta Corte a trata e caso sumario entama dor di mr. Di-Stefano Wernet, cu te recien tabata director di Fundacion Lotto pa Deporte. Raad van Toezicht a haci un investigacion interno y a conclui cu e director a malversa y enrikese su mes. Consecuentemente a kit’e “op staande voet” y a cuminsa un caso civil pa cobr’e bek y ta evaluando un keho penal contra e ex-Director na Polis.
Di-Stefano Wernet a dicidi di entama un caso na Corte, pasobra, manera el a bisa Hues, e no ta di acuerdo cu e forma con esaki a tuma luga y tampoco e ta satisfecho cu resultado di e investigacion.
Investigacion forensico y di accountant a saca afor cu Wernet a duna su mes bonusnan, a duna su mes “voorschot” y move sumanan cuantioso di cuentanan pa otro sin permiso. Tambe el a aloca fondonan na fundacionnan, pero sin aprobacion y pio ainda, contra ordo cu el a haya for di Raad van Toezicht. Ta considera cu el a tuma decisionnan y actua contra maneho y no na bienestar di e fundacion.
Separa di malversacion y mal maneho financiero, ta bin acerca cu Di-Stefano Wernet a hinca e fundacion den bastante problema cu otro instancianan deportivo, banco y cu e partner principal, Canadian Bank Note.
Fundacion Lotto pa Deporte tin masha mala suerte cu su directornan cu facilmente ta sucumbi pa e presion financiero. Asina tambe a kita actual Parlamentario Endy Croes (MEP) cu tambe a maluza su poder y enrikese su mes y su famia cu placa di Lotto. Esey separa di su biahenan di placer pa Miami, pero uzando placa di Lotto. E tambe a kit’e “op staande voet” pero na caminda a opta pa no persigui’e penalmente, aunke cu a cer’e na un principio pa hortamento di placa y mal maneho di fondonan di e fundacion.
E tratamento di e caso sumario contra Di-Stefano Wernet a dura 2 ora largo. Pero na final Hues a bisa e partidonan cu e tin un sugerencia. E caso aki no ta uno cu ta keda finalisa a corto tempo, tin diferente procedura cu por wordo sigui cu ta sigui alarga e caso. P’esey el a conseha partidonan pa sinta na mesa y wak si por yega na un areglo, prome cu e yega na tuma un decision.
El a duna e partidonan un luna di tempo pa haci e procedura aki y pa inform’e si a yega na un areglo. E fecha limite ta 31 di juli awo.
