Lo haci e proyecto den varios fase:
• E prome fase ta encera gran parti di e preparacion di suelo “grondwerk”, esey kiermen kita tur e yerbe bieu/existente, hisa e muraya existente di e fontein cu dos careda di bloki y yena e tereno cu santo y gordura. Mata existente di watapana, guyaba y Fofoti Haag lo keda manteni, y otro mata lo wordo kita, transporta y re-planta den e seccion berde di e parkeerplaats di DOW.
Tambe lo haci otro trabou di mantencion na e banchinan y lo realoca e watermeter kast. Alabes lo construi fundeshi pa un palo di bandera (vlaggenmast). Lo haci trabou di e prome fase den periodo di augustus pa december 2022.
• E di dos fase ta encera pone tuberia di irigacion y su sistema di pomp, instalacion di coriente y ponemento di klinkers. E di dos fase lo continua den 2023.
• E di tres fase ta encera planta algun mata local y algun mata hopi gusta y uza den nos hofinan. Tambe lo instala luz decorativo permanente, caba di instala e sistema di irigacion, instala e palo di bandera y lo baha e haltura di fofoti pa tin un miho bista riba e embeyecemento. Fase 3 ta proyecta pa 2023/2024. E escogencia pa vegetacion ta pa planta mata local di color parti pafo di e ex-fontein y den e ex-fontein lo enfoca riba mata protehi di Aruba. Pa escogencia di mata protehi a consulta cu Stichting Ban Lanta y Planta.
• E di cuater fase ta encera pone obra di arte riba e rotonde. Fase 4 ta proyecta pa 2024 en adelante. E obranan di arte proyecta lo mester refleha elemento di nos cultura (p.e. idioma, musica, custumber/tradicion y historia)
E prome y di dos fase di e trabou ta encera mas e parti di preparacion di e rotonde pa pone un embeyecemento y no lo mira e bunitesa ainda. Den fase tres y cuatro si ta bay mira e embeyecemento.
Manera a menciona cu e proyecto a cuminsa dia 17 di augustus 2022 y ta proyecta pa caba memey di december 2022 cu fase 1.
