Vocero di Secretario di Estado di Hulanda, Raymond Knops, a contesta nos awe cu e asunto di recorte di salario di empleadonan publico y semi-publico na Aruba no ta riba agenda di Conseho di Minister di Reino e siman aki na Den Haag, Hulanda. Probablemente e lo subi agenda otro luna, na december, aunke esey tampoco ta confirma ainda.
E discusion a cuminsa ora cu Gobierno di Aruba a bisa cu nan a haci un peticion na Gobierno di Hulanda pa corta e recorte di 12,6% for di salario di empleadonan publico y semi-publico na mita, esta pa kita solamente 6,3%. Minister-president a splica cu e ta wardando un aprobacion riba nan peticion, despues di e reunion di diabierna awo den Conseho di Minister di Reino. Pero, ora cu nos a check awe, nan a sigura na nos cu e topico ey definitivamente no ta riba agenda.
