Lo construi oficina nobo pa Polis y Migracion riba waf di Barcadera

701

Recientemente minister mr. Andin Bikker a bishita e oficina existente di Polis y Migracion riba waf di carga na Barcadera. Ey ta atende cu tur bapor grandi di container y e barconan chikito cu ta trece carga los of hasta pisca. Mirando cu e oficina existente a resulta hopi limita den espacio pa e trabounan importante cu mester ehecuta den cuadro di control y proteccion di nos frontera, minister Bikker a dicidi cu ta necesario pa haci un maximo esfuerso y explora e posibilidad pa construccion di un edificio nobo.

Minister Bikker a yama un reunion urgente cu entre otro director di ASTEC, Mike de L’Isle, director di Directie Scheepvaart, Rene Donata y Kwartiermaker di e Unidad nobo di KPA ‘Team Vitale Sectoren en Infrastructuur’, Andrew Hoo, caminda cu a presenta e vision cu ta necesario pa construi un edificio nobo pa Cuerpo Policial y Migracion Aruba na e waf di Barcadera.

E proposicion di minister Bikker a haya bon recepcion cerca ASTEC y a palabra cu ta traha un acuerdo di principio pa por yega na realisa un edificio nobo pa Cuerpo Policial y Migracion na e waf di Barcadera. Cu asistencia di DOW lo por inicia e otro procesonan necesario mas pronto cu ta posibel.

Minister Andin Bikker a gradici pa e cooperacion constructivo y pragmatico ricibi, pa por realisa un edificio nobo pa polisnan y personal di Migracion Aruba, cu ta importante den cuadro di vigilancia y control na e waf principal di nos isla. Minister Bikker tambe ta hopi gradici na e empleadonan y nan sindicatonan TOPA, STA, SPA y SEPPA, cu a trece na su atencion cu mester amplia of reemplasa e facilidadnan existente, cual a haya oido y un solucion inmediato.