A.M Laundry na Sero Patrishi a kima awe marduga

Awe net prome cu 5:00am e patruyanan di polis di Oranjestad, Noord y Santa Cruz a bay pura pa Sero Patrishi pa atende un candela. Na nan yegada a constata cu A.M. Laundry, situa na Sero Patrishi # 20-A tabata tapa bou vlam di candela. Tur loke por a haci tabata pidi pa bomberonan yega cu urgencia.

E prome unidad di Brandweer cu a yega a drenta den accion mesora pendiente e di dos otronan cu tambe mester a presenta, den nan afan pa combati e candela. Despues di no mas cu 10 minuut a logra domina e candela pero asina mes un parti di e laundry a keda tur destrui. Tecniconan di N.V. Elmar a presenta na e sitio pa desconecta coriente y sigura cu e casnan eybanda por a keda cu coriente sin problema.

Candela grandi na A.M. Laundry situa na Sero Patrishi. Un candela feros a destrui parti di e laundry. Bomberonan a actua mesora y a scapa gran mayoria di e negoshi.https://24ora.com/a-m-laundry-na-sero-patrishi-a-kima-awe-marduga/

Posted by 24ora on Saturday, December 19, 2020

Kico a sosode cu a conduci cu A.M. Laundry a pega na candela, ainda no ta conoci. For di marduga caba e ekipo forensico di polis a start cu nan investigacion tecnico na e sitio. Nan ta haya sosten tambe di recherchenan y Bomberonan di Cuerpo di Bombero, pa hunto yega na origen di e candela. Den casonan asina e compania di seguro tambe ta envolvi su mes masha di cerca pa saca afor oficialmente kico ta causa di e candela, prome cu nan paga pa e daño cu a keda atras.

A.M. Laundry ta existi desde december 2006 y ta bou direccion di e Venezolano, Michel Saade. Ta nota cu e tin dos di e laundrynan aki, un na Sero Patrishi y e otro ta situa riba L.G. Smith Boulevard. E laundry ta consisti di un parti comercial pero tambe pa clientenan individual, cu por drenta eyden y haci uzo di wasmashinnan grandi pa por laba nan pañanan. Tambe nan ta ofrece servicio di strica paña.

Pa e bario e candela no solamente a causa molester dor di tantisimo huma y holo stinki, sino tambe a causa panico. Bisiñanan tur a sali pafo pa mira kico tabata pasando. Tabata teme cu, como cu den un laundry ta uza hopi gas, cu lo por a bin explosionnan of expansion di e candela, pa cual a lanta tur famia pa tabata den estado di alerta si e candela lo a expande. Danki Dios cu Bomberonan a sa di domina e candela y limit’e solamente na un parti di e laundry.