Anthony Latham, encarga cu Aurora y Royal Funeral Home, den combersacion cu 24ora.com a sigura cu nan ta tuma tur preocupacion di habitantenan di San Nicolas na serio. Pero ta sigura nan, cu no tin motibo pa ta preocupa. Esaki el a bisa den cuadro di malcontento di habitantenan bibando cerca di e area unda e funeraria a haya un tereno pa construi un edificio nobo pa nan sigui brinda nan servicio na pueblo di Aruba en general.
E habitante, ademas di e stof molestoso, ta preocupa pasobra ta bay tin un crematorio na e sitio ey. “Mi kier a informa e habitantenan cu e proceso di cremacion no tin huma, no tin nada ta sali, pasobra tur cos ta pasa via di un filter. Nan por hasta pasa cerca mi na Aurora Funeral Home y mi lo duna nan tur splicacion.,” Latham a bisa.
El a splica cu el a bini cu e crematorio mas o menos seis aña pasa y e tin esaki tanto na Aurora como na Royal Funeral Home. “No tin ningun problema. Seis aña pasa caba a mustra e pueblo di Aruba, filmando e proceso na Miami, cu no tin huma y no tin nada cu ta sali. E filternan cu tin ta cosnan moderno y awendia e sistema ta mas moderno ainda.”
El a splica cu tin hopi demanda pa cremacion. Di e cantidad di clientenan cu nan ta haya pa luna un 50% ta pa cremacion, y hasta tin luna cu nan ta pasando esaki. Pues nan ta crema mas hende cu nan tin entiero den graf. Esaki ta e tendencia rond mundo, pasobra e ta hopi mas higienico. Asina por ehempel recientemente nan tabatin un caso unda cu e persona cu a fayece mester a sali di hospital y bay directamente pa e mashin di cremacion, pa motibo cu e tabatin un malesa contagioso. . “Imagina cu si no tabatin un crematorio, con nos lo a haci cu un caso asina. E lo mester a wordo dera den santana cu tur e riesgonan cu esey ta trece cun’e.”
Latham ta haya cu e hendenan, entre otro Eric Nassy y e periodista Hilario Doncker, mester a busca informacion, educa nan mes riba e tema, prome cu nan papia. “Pio si bo ta un periodista. Ta miho bo educa bo mes pa e hendenan no bisa cu bo ta papia coy kens. Pasa cerca mi y mi ta duna boso tur informacion. Si boso no ta contento ainda, mi ta hiba boso Miami pa mira e procedura aya nan.” Na Miami e cas di cremacion ta memey di Calle Ocho.
E director di e dos funerarianan riba Watty Vos Blvd, a splica cu nan tin masha hopi cliente di pariba y nan ta pidi pa tin un sede asina pariba di brug tambe. Ta momento pa San Nicolas haya un funeraria moderno, cu un mashin di cremacion den cual ta bay inverti un par di miyon florin.
Pa loke ta e tereno, el a bisa cu enberdad esaki tabata pertenece na Club Surnam, y ainda tin un pida di e edificio. Directiva di e club no ta existi mas. Ora cu el a tuma e tereno over, e mester a hasta paga belastingnan atrasa di e tereno. Y asina el a haya e tereno. “Educa boso curpa prome cu boso papia,” Latham a expresa.
For di Gobierno anterior ta trahando riba e proyecto aki y awor e tin tur e permisonan necesario pa construi e funeraria. E tereno ta pasa via di Notario y e tin su permiso di construccion cla caba. Apertura di e funeraria ta nifica cu lo habri algun cupo di trabou pa pariba di brug.
E negoshi ta uno duro, pasobra e mes tin miyones riba caya. Pero nan ta trata di haya mayoria di pago prome cu entierro, pasobra despues ta dificil. “Aworaki mes nos tin hopi placa mes riba caya. Mi ta cuminsa pensa pa hiba casonan Deurwaarder.”
El a finalisa bisando cu nan ta e miho funeraria na Aruba y esun mas barata.
