Recientemente LVV Santa Rosa a meldo na Bureau City Inspector cu durante un control riba dam di Tanki Leendert, a nota un acto sospechoso. Como cu Santa Rosa ta maneha e damnan rond di nos isla, regularmente ta pasa controla, pero e biaha aki a topa un tubo cu awa drentando e dam. A bin descubri cu e restaurant Mama Nita Take Away ta pomp su pos y mand’e via un tubo den e dam di Tanki Leendert, cu tur consecuencia di contaminacion.
Bureau City Inspector a pidi yudansa di Polis y Directie Volksgezondheid Aruba (DVG) cu ta controla riba asuntonan di higiena, pa compaña nan pa e sitio y eynan berdad a topa cu e cas cu ta pomp awa di pos den e dam. E doño di cas, di cual tin un restaurant den cura, a admiti cu e ta pomp awa di pos den e dam. El a declara cu e pos ta yena lihe y pa evita cu cada bes paga pa chupa e pos, a scoge pa pomp esaki den e dam.
Polis a splik’e cu esaki absolutamente no ta permiti! E mester a kita e tubo di biaha. Polis a tuma su datonan y a tuma e caso over. Departamento di Salubridad lo tuma samples di e awa pa averigua con hopi e awa di e dam ta contamina. Despues Departamento di Santa Rosa lo evalua con lo saca e awa contamina for di e dam pa ora awa yobe, e awa no ta contamina atrobe.
Un sugerencia di BCI na esunnan cu ta comete e sorto di actonan aki, ta pa stop di haci esaki. Riba dje e damnan ta practicamente seco y awa casi no ta yobe. No tira sushi tampoco den e damnan. Ban tene e damnan limpi pa ora awa yobe e agricultornan por uza e awa aki pa muha nan matanan.
