Hunto cu e ritmo inigualabel di Grupo di Betico, ta duna forma na e videoclip nobo di Landa Henriquez “E Tey Atrobe”, cual nos tin cu bisa ta un obra maestra y hopi pegahoso, manera cu Landa sa trece tur aña.

Roderich Lopez di 297 Studios tabata na encargo di e produccion di e videoclip y e ta conta cu e cancion ta ilustra un tiki di antaño bin bek pa awo, manteniendo lo moderno den dje. 

Trahando e video clip tabata tremendo, segun Lopez. E grupo uni tabata haci’e mas dushi. Esaki ta di cuater proyecto cu Lopez ta haci pa Landa y nan ta keda pa busca pa haci esey bek, pasobra e manera con nan ta traha hunto ta bay hopi bon.

Landa Henriquez cu su videoclip nobo "E Tey Atrobe" hunto cu Grupo di Betico

Landa Henriquez cu su videoclip nobo "E Tey Atrobe" hunto cu Grupo di Betico. Click e link pa mas https://24ora.tv/2sGvMKz

Posted by 24ora on Monday, December 2, 2019

Algo cu a ilustra hopi di e video tabata e famia. E bon ta cu door cu Lopez ta trahando pa algun tempo caba, e video clip aki di nan caba e union a start. Bon tambe ta cu apart cu Grupo di Betico tin un union unico, e famia cu ta rond di dje, cu a bin for di Landa, conoci, amistad, trahadonan, tur a join den e grupo aki a haci e videoclip aki a haci’e mas zuiver.

Location

Nan tabata brainstorm masha hopi mes pa loke ta e location y tabata pensa ta na unda y toch pa los’e un tiki di loke a filma caba den Santa Cruz. Esey a haci cu a bay p’abao di brug, unda cu a haci’e na Malmok. E luga tabata perfecto. E location tabata zuiver. Tabata tin un contrast hopi bunita, mirando cu tabata banda di lama, mirando mata di coco, mata di kwihi, e santo di lama, ilustrando asina un fiesta di manece te anochi.

Grupo di Betico

Gus Oduber ta un di e musiconan prominente di Grupo di Betico y ta compositor di e cancion “E tey atrobe”. E cancion aki a wordo componi aña pasa, mirando cu e mester a forma parti di e concierto di Grupo di Betico pa nan celebracion di 50 aña. Pero tempo a caba cu nan e momento ey y a ward’e pa e aña aki.

E importancia no ta na e momento cu e ocacion. Importante ta cu e cancion a wordo lansa. Na e momento cu a mande pa Landa caba, a sinti cu el a gusta e cancion. Ora cu ta grabando den studio, a ripara mas y mas cu e cancion a cay hopi na su agrado, dunando e grupo y Oduber como compositor, e satisfaccion cu e cantica ta gusta.

Dicon Landa

Grupo di Betico y Landa Henriquez tin un lazo, mirando cu nan a yega di graba un cancion caba cu yama “Fin di aña tey”, cual tabata un exito. Den e caso aki kier a duna un extension di e hit cu a sosode cu e cancion anterior, kier a dun’e un tiki extra.

E titulo ta casi mes cos. E ta ilustra e extension di e cancion. Naturalmente cu un otro melodia, un otro letra, un shake diferente.

Den studio y videoclip

Landa ta un persona basta facil pa traha cun’e. Es decir cu bo no mester pidi hopi. E ta pone di su parti e ta hinca hopi den e pensamento, y e preparacion pa e grabacion y tambe di biaha su mente ta cuminsa traha kico lo por bay den e videoclip. Den e caso aki, cu nan a acerca Roderick Lopez, e ta bira un tiki mas facil, pasobra Roderick tambe ta un persona cu ta graba e videoclipnan y tin experiencia den e parti aki. Ta supone cu e fantasia a cuminsa traha y yega na e dia di awe.

Exito

Oduber a comenta cu Grupo di Betico ta tocando e cancion caba. Pero desde awo p’adilanti ta bay wak Landa tambe hunto cu Grupo di Betico riba stage aki aya.

Encanta

Landa Henriquez mes a splica cu e motivacion grandemente a bin di e rais di e exito cu tabata tin tres aña pasa, e cancion cu el a canta cu Grupo di Betico, cual ta “Fin di aña tey.” Den e ultimo añanan, hendenan a pidi pa mas. Gus a dicidi skirbi e cancion aki, atrabes di e mesun motivacion aki. A grab’e e aña aki y hunto cun’e, e videoclip, pa duna un poco e imagen y realmente e contenido di e cancion aki.

Kico e ta refleha

Cu tempo ta bula hopi lihe compara cu Macuarima, cu tabata un celebracion. Esaki tambe ta un celebracion pasobra bida bo ta celebra tur dia, pero aki ta conscientisa pa tuma tempo cu hopi biaha nos ta lubida, cu tempo ta bula y nos ta lubida di celebra realmente di curason.

Esey ta un poco enfasis, e motivacion y mensahe atrabes di e cancion aki. Cu e ‘Tey atrobe”.


Union den pueblo

En general, Landa Henriquez ta pensa cu falta union den nos sociedad. Tempo cu Aruba tabata parti di Antias, nos tabata tin mas union cu awe. Tur hende por yena espacio pero lamentablemente Henriquez ta sinti y hopi hende ta comparti e mesun pensamento, cu nos ta pasa hopi tempo ta bringa otro, enbes di busca camindanan comun cu nos ta pensa mucho mas positivo.

Si pensa asina, Aruba awe lo tabata den un situacion diferente cu nos ta bibando aden, lamentablemente. Landa si ta un hende optimista. E ta spera y kere cu un ke otro grito por trece nos bij. Si Landa ta hopi preocupa pa e futuro generacionnan cu tin cu biba den e sociedad cu nos ta bibando awe.

Si berdad nos tin hopi luho, hopi cos. Careteranan bunita, pero unda e parti social, e parti humano a keda, unda e parti spiritualidad, e parti di hermandad a keda. Antes esey tabata combibi cu otro. Landa ta mande esaki como un mensahe pa saca lo positivo for di e negativo. Ban drech’e, ban sea consciente. Tempo ta valioso.

Con nos por wak e video clip

For di awo caba a lansa e videoclip riba Youtube. Awendia no ta existi CD mas. E ta riba Youtube, Facebook tambe lo tin’e y e ta pa un comparticion pa cu pueblo. Ta spera cu pueblo gosa di e videoclip aki. Nan a pidi’e y nan a hay’e y lo bay entretene unda cu Landa por ta presente unda cu Grupo di Betico e siman aki y e ultimo simannan di december.

Landa ta desea henter pueblo di Aruba un feliz pasco, den harmonia, hopi felicidad y mas cu tur ta desea tur hopi salid. 2020 ta un aña prospero cu hopi miras na un miho futuro.

Comments

comments