Un bon fundeshi den Cristo Hesus, bon consenshi, norma y balor y etica ta locual cu tur hende mester, pa lanta un famia, cu yiu firme cu bon caracter y integro.
Y Bijbel ta siña nos lo siguiente:
Santiago 1;19 Compronde esaki, mi rumannan stima. Tur hende mester ta lihe pa tende, no lihe pa papia y no lihe pa rabia. Pasobra rabia di hende no ta produci e husticia di Dios.
Rabiamento y palabra malo, no ta yuda cu nada, papia palabra malo constant sea na Papiamento of otro idioma den cas constantemente ta venena bo hogar y no ta yuda cu ningun clase di crecemento.
Zundramento ta crea herida, cu pocopoco ta trece falta di confiansa y division, pasobra un yiu por puntra su mes, si mi mama of mi tata stima mi di berdad, dicon cada rato nan ta papia malo cu mi of menasa mi.
Ofensa ta un porta habri pa diabel drenta. E ta coy bentaha y haci daño spiritual, mental y fisico, pasobra por yega asina leu cu pa motibo di ofensa constantemente cu un hende por tuma desicion di haci daño na su curpa.
Ma papiando e berdad den amor, nos tin di crece den tur aspecto den dj’E, kende ta e cabes, esta Cristo. (Efesionan 4:15).
No laga ningun palabra dañino sali for di boso boca, sino solamente palabra pa edificacion, conforme e necesidad (Efesionan 4;29).
Y e sirbido di Señor no mester ta pleitista, ma cariñoso cu tur hende cu capacidad pa siña, cu pasenshi ora e wordo trata inhustamente, cu ta coregi cu suavidad esunnan cu ta den oposicion, pa kisas Dios duna nan repentimento, cu ta hiba na conocemento di e berdad. Y nan bin na sano huicio y scapa for di e trampa di diabel, den cual e a tene nan preso pa haci su boluntad.
E exigencia di respet ta di gran balor pa nos tur:
Tur hende cu ta menciona e nomber di Señor mester abstene nan mes for di pica.
E sirbido di Dios no por ta un hende cu ta haci redo, forma pleito y division.
E sirbido di Dios no por ta orguyoso, arogante, y malicioso.
E sirbido di Dios mester sirbi Dios, y no placa y material.
E Sirbido di Dios no por ta apoya inhusticia y inmoralidad. (1 Corintionan 6:9).
E sirbido di Dios mester ta prudente, activo, y disponibel pa e obra di Dios.
E sirbido mester ta stimado di su famia, dunando testimonio cu su bida, na su yiunan, y na comunidad.
E sirbido di Dios no por ta un hende di curason dobbel.
E sirbido di Dios den ningun forma no por ta envolvi den cos cu no ta grada Dios.
E bon hende, for di e bon tesoro di su curason, ta saca loke ta bon,y e mal hende, for di e mal tesoro, ta saca loke ta malo, pasobra for di e abundancia di curason su boca ta papia.
Sin e direccion di Dios, ta dificil pa nos keda para riba nos pia den tur cos, pasobra nos mester di Dios den tur cos y nos mester biba un bida , caminda nos ta reconoce Cristo como e parti central di nos bida.
E presion di mundo, e arogancia, orguyo y materialismo tin hopi hende domina, door cu nan ta mara na placa y poder,
Y hopi no ta realisa con necesario ta pa reconoce Cristo Hesus,den nan bida, Dios tene misericordia.
Señor ta fiel y poderoso, bondadoso, yena cu bon deseo pa nos.
Sinceramente, Pastoor Marcel Balootje.
