Awe tardi pa 4:10 pm a sosode un caso di ladronicia na Sero Colorado na San Nicolas. Polis a topa eynan cu un famia turista procedente for di New York, di Merca, cu a caba di bira victima di ladronicia. A kibra nan bentananan di auto y horta un tas y e cartera di e turista. Esaki a sosode un rato cu nan a para nan auto riba e sero pa bay cana cerca di e lama na punta di nos isla.
E turistanan a huur un auto un auto for di Thrifty Car Rental. Ta trata aki di un auto marca Suzuki, modelo Baleno, color shinishi, numera V-647. Ora cu nan a caba di cana banda di lama y a cana yega nan V-wagen bek, a constata cu a kibra e bentana di pasahero dilanti y a kibra e bentana patras. Te na momento cu polis a presenta, e turista a sinti falta solamente di un tas grandi cu su cartera aden. Cuanto placa efectivo e tabatin den dje, e no a menciona.
Mester menciona cu aunke el a pasa den un situacion menos agradabel, e turista a gradici algun ciudadano cu a yega eynan y a saca un man mesora pa yuda nan, door di yama polis, yama seguro, etc. E trato ricibi di e Rubianonan eynan y di e polisnan di San Nicolas cu a yega mesora, a duna e turista un sentido di siguridad y aprecio pa nos hendenan.
Nan vakantie a caba awe y mañan ta regresa New York bek, pero e priminti di lo regresa otro aña atrobe. Nan gusta Aruba masha y a djis lamenta e sucedido.
