Recientemente Kiwanis Club of Palm Beach Aruba a instala su directiva nobo pa e aña Kiwanistico 2020-2021. E directiva nobo lo consisti di e siguiente boluntarionan:
- Presidente – Sr. Richard Roy
- Secretario – Sr. Onasito ‘Chito’ Thiel
- Tesorero– Sr. Carlos Tapias
- Presidente electo – Sr. Rothmar Coenraad
- Vice Presidente – Sr. Daniel Aguirre
- Presidente Saliente – Sr. Ivan Ng
- Director – Sr. Jerome Barendregt
- Director – Sr. Michael Bareño
- Director – Sr. Misha Bemer
- Director – Sr. Evan Giel
- Director – Sr. Roy Mezas
- Director – Sr. Bert van der Horst
- Director – Sr. Jan Welage
Na e ocasion aki e Presidente saliente, Sr. Ivan Ng, den su discurso a expresa su gratitud pa e esfuerzo grandi cu e miembrecia a haci den e aña anterior. Ta aplaudi e adaptacion nan haci door di e miembro nan pa asina por sigui yuda e comunidad durante e crisis di COVID19.
E Presidente saliente tambe a nota cu prome cu e crisis di COVID19 e club a ehecuta e cantidad di tres evento pa recauda fondo, esta e Kiwanis Dinner Auction na November 2019, Kiwanis Carnival Masquerade Party 2020, e Kiwanis Carnival Fundraising Tent 2020. Conhunto, pa medio di e iniciativanan aki a logra recauda rond di Afl 150.000,- cu a keda distribui entre donacio y proyectonan social pa nos comunidad. Un di e proyecto nan cu a sostene ta “Happy To Give Back” di CEDE Aruba cu tabata y ainda tin un impacto grandi riba nos comunidad. Tambe a logra di finalisa e rapport “Community Analysis” traha cu ayudo di varios organisacion cu a indica cu na prome luga, nos mester enfoca riba educacion di e mayornan. Esaki ta e prome parti di un plan mas grandi, for di cual un programa di educacion pa mayornan ya ta den su prome fase di desaroyo.
Como Presidente nobo pa e aña 2020-2021 a keda instala Sr. Richard Roy kende ta miembro desde aña 2016. E Presidente nobo den su discurso a afirma su dedicacion personal na e concepto di servicio pa nos comunidad y sigur awo cu comunidad ta enfrenta un temporada dificil causa pa COVID19. E Presidente a expresa cu e tin e confiansa cu e miembronan lo sigui haci nan maximo esfuerzo pa sirbi e comunidad den un forma adapta na e normal nobo como consequencia di COVID19. Tambe, como Presidente di Kiwanis Club of Palm Beach e lo sigui cu e ehecucion di e plan strategico vigente, unda lo enfoca riba proyectonan basa riba e resultado di necesidadnan cu a resulta for di e “Community Analysis” anteriormente menciona.
E instalacion a tuma luga den Hyatt Regency Resort su ballroom den un cena adapta na e protocolnan di distancia social di COVID19. Presente e aña aki tabata solamente e miembronan di e directive saliente y esun nobo. Ademas di mantene distancia social tabata tur miembro presente a haci uso di nan tapaboca. E discursonan a keda graba den un video pa e demas miembronan di e Club y organisacionan di servicio Hubenil cu ta liga a dje.
Kiwanis Internacional ta un organizacion caritativo mundial, dedica na haci nos mundo miho door di cambia un comunidad of un mucha cada bes. Mas informacion por haya riba: www.facebook.com/kiwanispalm beacharuba
