Diasabra, 30 november 2019 a tuma luga e “Kidpreneur$ B-azaar”, den Caya Betico Croes
banda di ALDO. E bazaar aki a wordo organisa door di IDEA cu sosten di Traimerdia y a wordo presenta door di e muchanan cu a participa den e projectonan di: “Kidpreneur$ with BIG Ideas” y “Kid$ BIZ Market”.
“Kidpreneur$ with BIG Ideas”, ta un projecto cu a tuma luga na tur e 9 traimerdianan y tabata destina pa e muchanan di 5-de y 6-de klassen cu sa bishita Traimerdia. Na final di e projecto na cada traimerdia, e muchanan a ricibi un certificado di participacion cu a wordo entrega na nan door di minister di Finanzas, Asuntonan Economico y Cultura, sra. Xiomara Ruiz- Maduro. Un totaal di 259 kidpreneur a logra haya e certificado aki.
“Kid$ BIZ Market”, ta un projecto cu a tuma luga na Directie Economische Zaken durante e herfstvakantie aña pasa y a sigi e aña aki den juli. E projecto aki tabata pa muchanan cu no ta bishitando traimerdia. Un totaal di 63 mucha a participa den e projecto aki y a ricibi nan certificado. E projectonan aki a ofrece e muchanan educacion empresarial cu lo yudanan reconoce oportunidadnan comercial, door di siñanan con pa gana placa ya for di un edad hopi jong usando nan mesun creatividad. Esaki nan ta hasi door di haya workshop den diferente angulo, manera den arte p.e.: carchi creativo, pintamento riba canvas y con pa crea un areglo musical cu lo por genera placa.
Tambe nan a siña con pa traha juice y snacks saludabel/natural, traha gel di aloe pa curpa y cabey, traha armband y mucho mas. Ademas nan a haya les di teoria di finanzas y cada mucha a traha nan mes un business plan. Durante e workshopnan nos por a ripara cu cada mucha cu a participa den e projecto aki, tabata hopi satisfecho y a keda motiva pa un dia nan por experiencia den un forma educativo, kico ta pa “ser un comerciante”. Pa e motibo aki, Iniciativa pa Desaroyo di Empresa Arubano (IDEA) ubica den oficina di Departamento di Asuntonan Economico, Comercio y Industria (DEZHI) a dicidi di organisa un “Kidpreneur$ Bazaar”, pa e muchanan aki.
Durante e bazaar aki 35 mucha a bin hunto como un comerciante ariba nan mes, y a bende
diferente productonan manera: cupcake/tert y kuki, juice di lamunchi, pinturanan ariba
canvas, pinturanan/ decoracion riba boter, differente decoracionnan di pasco, armband,
recycled gift bags, slime, etc. Durante e bazaar algun artistanan jong a presenta diferente
cantica di pasco, cu baile y tambe tur hende presente por a disfruta di e luznan di Pasco.
Cada mucha presente na e bazaar aki por a experiencia con pa ta un bon comerciante, door di comunica y ta amabel cu cliente y tambe a siña con pa duna nan producto un bon prijs pa asinanan por wordo bendi.
IDEA kier a gradici tambe tur su partnernan manera, SETAR, Bureau Traimerdia, Departamento di Cultura, ALDO, DOW y tur nos coleganan di DEZHI cu a juda durante e evento aki, pa e evento exitoso aki di: “Kidpreneur$ Bazaar”. Un danki na tur e pueblo di Aruba cu a bin duna e muchanan aki, cu ta nos futuro, nan aportacion. Y un danki na cada mayor cu a confia den nos, y a sigi guia nan yui pa por a participa den e bazaar aki. Y por ultimo nos kier a desea tur e muchanan cu a participa den e projecto di “Kidpreneur$ Bazaar” hopi exito.Abo tin un Idea? Hasi bo Idea realidad. Bishita Idea na Departamento di Asuntonan Economico, Comercio y Industria, na Sun Plaza di dos piso, y nan lo yudabo cu tur informacion y guia necesario.
