“Mi ta hopi emociona y contento” tabata prome palabranan di Kiara Arends durante un entrevista cu 24ora.com. Ta recientemente cu Arends a huramenta como abogado, desde awo ta carga e titulo di Meester in de Rechter, mr. Kiara Arends. Arends awo por aplica ley den henter Caribe Hulandes.
E tabata un proceso di mas o menos seis aña. Na aña 2019 el a cuminsa cu su bachelor na Universidad di Aruba sigui pa su master caminda a keda mita aña na Belgica y e resto di periodo na Aruba mes.
Arends a durante su periodo como studiante a core stage na Kloes Kock & Partners, awo cu a termina su estudio a ricibi trabou mesora tambe n’e bufete di abogado. Abogado, mr. Kiara Arends a atende Mon Plaisir sigui pa Colegio Aruba riba nivel VWO.
Despues di termina VWO Arends no tabata sigur kico e kier a sigui studia. Despues di atende e Academic Foundation Year na Universidad di Aruba, e pasion y amor pa ley tabata hopi cerca di su curason.
E tabata un decision facil pa studia ley na Aruba mes mirando cu Universidad di Aruba ta brinda e estudio ey. E no a pensa mucho y a dicidi di studia na Aruba mes, den su propio comunidad sin cu tin cu bay afo, leu for di cas, leu for di famia pa studia algo otro.
