Tabata awe marduga pa mas o menos 1:00am cu un auto a perde control net na e bocht di Sabana Liber, baha caminda y ranca henter un pal’i luz saca for di tera. Ni chauffeur ni e ocupante no tabata desea atencion medico. Nan auto a keda total loss pero separa di daño material, nan a causa un inconveniencia na decenas di famia y a laga nan mes den un gasto grandi!
For di NV Elmar nos a compronde cu asina cu e accidente a sosode, cu Polis a yama nan, a activa mesora. Esey a encera cu mester a saca diferente truck y varios trahado pa subi warda den ora di marduga. Mester a reemplasa e pal’i luz completo, pero mas cu tur cos, reemplasa e transformer grandi cu tabatin eyriba, cu a causa cu e bario a keda sin coriente. Separa di kabelnan di coriente, tambe tabatin kabelnan di Setar ta core eyriba cu tambe mester a reemplasa.
Ta den e estado aki e auto Mitsubishi Outlander a bay laga e pal’i luz despues di e dal den dje y rank’e completamente for di tera. Ta obvio cu velocidad halto a hunga un rol grandi den e accidente awe marduga na Sabana Liber.
For di algo prome cu 1’or di marduga, ta te awe mainta pa 8:35am NV Elmar a logra reconecta suministro normal di coriente pa e vecindario. Claro cu habitantenan di Sabana Liber y vecindario no a aprecia e asunto aki, pasobra un chauffeur iresponsabel a stroba nan soño henter marduga. Algun bisiña a reclama cu nan tin carni den freezer y ta teme si nan por a daña, etc.
E gastonan den un accidente asina ta core for di 35 mil florin te cu mas o menos 50 mil florin. E pal’i luz, e transformer pero sigur e suma cu mester paga trahadonan na overtime, tur ta keda monta. Trahadonan cu a subi warda den marduga y a traha como 8 ora te mainta, ta exigi un pago mas halto cu si esaki a sosode durante nan oranan di trabou den siman y den dia. Seguro lo mester cubri e gastonan aki, si nan saca afo cu e chauffeur no por a yuda.
