Un potret saca dos aña pasa, Minister Plenipotenciario Guilfred Besaril a presente como regalo di pais Aruba na Papa Francisco, durante un encuentro ayera na Vaticano. E potret den estilo “Night Photography” di Kapel di Alto Vista, ta saca casi 11or di anochi, riba un anochi di luna yen, cu “setting” di camara uzando e luz natural pa ilumina e imagen. A print e potret, cu a haya e nomber “Hope” riba un “Glossy Canvas”, cu a dune un toke unico di un berdadero obra di arte.
E organisacion turistico COTAL (“Confederación de Organizaciones Turísticas de América Latina”) a invita Aruba pa un audiencia priva cu Papa Francisco ayera dia 6 di december 2017 na ciudad di Vaticano, na Roma. Minister Guilfred Besaril tin algun dia caba na Roma, Italia atendiendo varios reunion cu mandatarionan di dicho pais y dignatarionan di e cuidad di Vaticano. Minister Besaril a clausura su bishita cu un audienicia priva cu su Santidad Papa Francisco.
El a forma parti di e delegacion di COTAL, Presidi pa Don Armando Bojorquez Patron. E delegacion ta consisti di mas di 45 empresarionan importante den e mundo turistico Latino Americano, cu a atende tambe un audiencia general cu Papa na e ciudad di Vaticano, Roma. Banda di esaki tabatin varios encuentro cu empresarionan den e sector turistico Italiano. Tur esaki den cuadro di e 60 aniversario di COTAL.
Minister Besaril a habri e serie di reunionnan general entre empresarionan Italiano y Latino Americano dialuna dia 4 di december ultimo. Durante e diferente encuentronan Minister Besaril a percura pa informa esunnan presente di tur locual Aruba tin di brinda como destinacion turistico. Banda di ta un honor grandi pa Aruba di por a ricibi e invitacion pa e audiencia cerca Papa Francisco, e bishita di Minister Besaril na Vaticano ta un momento historico pa nos isla. Durante e bishita aki e Santo Papa a bendiciona bandera di Aruba, cual bandera na su turno, Minister Besaril lo entrega na Minister Presidente Evelyn Wever-Croes na su yegada bek na Aruba. E bandera bendiciona aki lo tin su luga permanente den bestuurskantoor di Aruba.
Ayrton Tromp (21) a cuminsa practica su hobby di fotografia 6 aña pasa como hoben, pero mas o menos 3 aña pasa, ora a cumpli 18 aña, a dicidi di comberti su pasion den su negoshi y a habri Artn Photography.
