Den Village na San Nicolas Kamini’s Kitchen ta reparti cuminda pa muchanan di e bario. Manera tur sa, hopi hende a perde trabou y ta yuda unda por. Luciano Milliard hunto cu Kamini’s Kitchen a dicidi diasabra atardi reparti cuminda p’e muchanan.
E idea a nace den un grupo di diferente hende, esta Kamini Kurivink di Kamini’ s Kitchen y Micheal Raymond. Un paar di siman pasa nan a drenta hunto den bario di de Vuyst pa reparti cuminda eyden tambe y awo a toca turno na Village. E habitantenan di Village a demostra hopi aprecio cu tin un grupo, un restaurant di San Nicolas a tuma e decision di sali y trece cuminda pa nan.
Segun Milliard, tin hopi hende den necesidad y tur esaki ta pa motibo cu nan a perde trabou den e pandemia aki. “Nan a keda contento cu nos ta contribui, e ta algo di un biaha,” el a bisa. Nan meta ta pa por sigui haci esaki den diferente bario di San Nicolas. E necesidad ta grandi, pero lo evalua con pa sigui yuda.
Esaki ta di dos biaha cu e grupo aki ta reparti cuminda desde cu Covid a haci su entrada na Aruba. Kurivink a bisa, cu e cuminda ta destina pa muchanan entre 2-17 aña cu no tin nada pa come. Na De Vuyst a logra reparti mas cu 50 cuminda, mientras cu e biaha aki y e biaha aki a entrega mas di 75 cuminda den Village. “Tanten cu mi tin, ami y e team lo sigui yuda. E team ta consisti di 6 persona,” el a bisa. Kurivink ta kere cu hendenan por saca un man y yuda un otro den necesidad pa por fabor haci esey.
