“Den e ultimo dianan di campaña tabatin un cantidad di #fakenews cu mi ta arepenti awor di no a reacciona riba dje. Un di nan ta cu mi a wordo nombra como director di APA y of ATA cu un salario di 25 mil florin pa luna”, asina Minister Plenipotenciario di Aruba na Hulanda, Juan David Yrausquin, a duna di conoce awe.
“No tin ningun base pa e rumornan falso aki. Mi no a wordo nombra, ni mi a pidi pa wordo nombra den ningun funcion cu no ta Minister Plenipotenciario di Aruba na Hulanda. Fuera di esaki a wordo bisa cu Gobierno a paga mi estudio na Columbia University y mi estadia na Merca, locual tampoco ta berdad: Mi a bende mi cas pa por a paga e temporada cu mi tabata na Merca y mi no a cobra un florin di Gobierno durante e periodo aki”, asina e mandatario a finalisa bisando.
