Directora di Cas di Cultura, Sra. Vicky Arens-Tjon A Tjoe a acerca Sr. Croes pa ta e director artistico pa e concierto di gala cu lo tuma luga dia 13 di october y Sr. Croes a tuma e reto aki sin a duda ningun momento.
“Esaki sigur ta un honor pa mi. Cas di Cultura a hunga un rol hopi importante den mi desaroyo como musico/pianista profesional,” segun Sr. Croes.
Johnny Croes a nace na Aruba y e ta un graduado di prestigioso Berklee College of Music na Boston, unda e la obtene su Bachelor degree, cum laude.
Actualmente, Sr. Croes ta sub-director di Scol di Musica Rufo Wever, na unda e ta dunando les pa mas cu 18 aña y tambe a duna su contribucion pa cu e desaroyo di e curriculum di e scol.
Sr. Croes tambe a publica tres buki pa piano cu composicionnan di Rufo Wever y Padu Lampe, autornan di himno nacional di Aruba y ta miembro di directiva di e Aruba Symphony Festival & Academy.
Un di e metanan cu Sr. Croes tin poni su dilanti ta pa crea Aruba su orkesta hubenil, cu ta un proyecto tanto social como creativo.
Segun Sr. Croes, “Toca musica hunto, ta forma ser humano contento. E ta hisa bo animo banda di cu e ta desaroya bo celebro. Nos sociedad actual mester programanan pa desaroya hobennan di manera positivo. Mi kier start cu 100 mucha, 50 na Playa y 50 na San Nicolas”.
E meta aki ta combina cu e deseo di Cas di Cultura pa ta e cas di Aruba su orkesta symfonico. Asina hunto Sr. Croes y Cas di Cultura ta cana e caminda pa realisa e meta menciona.
