Ya pa demasiado aña kaba Kòrsou ta konfrontando hopi problema i skandal den diferente di nos institutonan di prestigio netamente den e area finansiero. Aki sr El Ayoubi ta referí na entidatnan i institutonan manera CBCS, HNO/CMC, Servisio di Impuesto, RDK, Wit Gele Kruis, ENNIA, PSB i resientemente e claim mionario di e kompania KLESH riba refineria/ RDK, ta al orden di dia di un manera hopi negativo.
Manera ta keda bisa popularmente ku Gobernashon ta kontinuidat pues e problemanan ta pasa di un gobièrnu pa otro i hopi gobièrnu di turno ta skohe konsientemente pa no atendé ku esakinan mirando e embergadura di e problema of sentido di populismo negativo ku esaki lo por trese kuné si atendé e problema debidamente.
Pa loke ta trata e odisea di Girobank sr. El Ayoubi ta sigui bisa ku e ta lamentá inmensamente ku no por a yega na un deal entre APC i Girobank. Si e fushon aki lo a konkretisá lo por a sigui garantisá ku klientenan lo por a keda dispone di nan plakanan ku nan a traha i depositá den e instituto finansiero ku a traishoná nan konfiansa. Alabes lo por a salbaguardiá e kuponan di trabou di trahadónan di Girobank i loke tambe ta importante ta ku nos lo tin un banko shen porshento lokal kaminda mas divisa lo keda generá ku lo keda aki na Kòrsou o sea lo tin mas plaka pa invertí den nos pais.
Pero e realidat amargo ta ku pronto lo sera Girobank pa motibu di un desviashon total di étika i moral i un falta di kontrol rígido kaminda a traha espasio pa akshonnan froudulento tuma lugá esaki bou di supervishon interno i eksterno di Banko Sentral miéntras e tarea primordial di Banko Sentral mester ta pa pèrkurá ku e kliente su plaka ta safe i sigur. Gobièrnunan di turno, lesa e ministernan di Finansa di turno, tambe a faya barbaramente pasombra tur tabata debidamente na altura di e situashon preokupante di Girobank pero na a aktua ku e firmesa i outoridat nesesario pa ku e situashon aki.
Segun sr. El Ayoubi tantu komisarionan i direktivanan/ gerensianan di tantu Girobank komo CBCS durante hopi aña no a hasi nan trabou pero a abusá di e situashon pa asina preferensia ‘friends and family’ riba lomba di klientenan. Ta imposibel ku te ainda no a atendé ku ni un di e personanan ku a hasi nan mes kulpabel na e aktonan koruptivo i bochornoso aki kende nan no a tene kuenta ku futuro di e empleado di banko, tampoko ku e nòmber i konfiabilidat di e instituto lo keda tacha, ku no a honra ni respetá e konfiansa di e kliente manera e penshonado, e adulto ,e hóben, e mucha, e empresanan i negoshinan chikí i grandi a depositá den e banko aki.
Sr. El Ayoubi ta sigui bisa ku ta fásil i kumbiniente pa gobièrnunan di turno indiká ku niun gobièrnu no tin falta pa ku e situashon di Girobank pero ku ta falta di mal maneho di e instituto mes. Pero fakto ta ku gobièrnunan di turno ta responsabel pa entre otro nombramentu di komisarionan den diferente instituto i o entidat netamente pa vigilá i aportá pa e e asuntunan kana na òrdu pues no por laba man asina fásil. Segun sr. El Ayoubi loke e situashon aki tin ku siña kada gobièrnu ku awor mas ku nunka mester evaluá e ròl di e komisario i su maneho di forma ku keda sin tene niun hende responsabel pa aktonan di mala fe no ta un opshon!
E reperkushonnan ku e problemanan finansiero ta tresiendo kuné den e diferente institutonan ta fatal pa desaroyo di nos pais esaki ku of sin Covid -19. Ku nos no kambia nos mindset, komportashon i sigui pasa ‘lightly’ riba e kosnan robes ku ta tuma lugá den nos pais nos lo keda konfrontá entre otro diskrepansianan finansiero ku lo keda perhudiká nos mes sosiedat. KÒRSOU NO POR SIGUI ASINA!
