Jeremy Croes, ta consehero riba desaroyo sostenibel na Directie Economische Zaken, Handel en Industrie (DEZHI). El a conta nos riba su parti den un di e sesionnan na Aruba Investment Summit cu a presenta den sector di agricultura, energia renobabel y tambe maneho di desperdicio, kico tur ta e retonan cu Aruba ta confrontando.
E presentacion tambe tabata mas dirigi riba purba na mustra e inversionistanan presente kico e potencial ta pa inverti na Aruba.
Den e sector di agricultura tin diferente reto manera coriente, awa, pero tambe acceso na infrastructura y tereno. “E conocemento tambe. Nos ta purba di trece e conocemento cu tin na Hulanda pasobra Hulanda ta un di exportadonan mas grandi di mundo den agricultura, pa purba trece nan Aruba pa siña di nan y pa nan trece nan conocemento pa nos,” segun Croes.
Pa loke ta inversionistanan y companianan presente, e pregunta ta si nan a mustra interes pa yuda Aruba soluciona e retonan aki. Croes ta sinti cu tabata tin basta interes sigur riba e parti di energia sostenibel.
“E cos bunita di energia ta cu e ta core den tur nos sectornan. Kiermen esey tabata algo hopi interesante, un tema hopi relevante tur parti di mundo no solamente na Aruba, ful rond di nos e ta un reto.”
