Durante un otro bishita pa topa cu nos Arubianonan den rehabilitacion di droga na Colombia, a logra papia cu Jean Paul v/d Kuyp. Eynan el a splica y conta cu Corporacion Con Animo ta bayendo hopi bon.
Nan ta trahando full time yudando hende. Mayoria hende cu nan tin eynan ta hendenan cu t’ey riba nan mesun boluntad. Ta hendenan cu nan mes kier cambia y nan ta yuda nan na Corporacion Con Animo cu nan conocimento y specialismo pa yuda nan sali for di nan problema.
Awor aki nan tin como 12 hende di Aruba den proceso di recuperacion. Semanalmente nan ta hayando e yamadanan di hopi famia di Aruba y esaki ta pa hopi tempo asina. Hopi famia no tin e fondo suficiente pa yuda nan ser keri pa bay un centro di rehabilitacion priva pafo di Aruba. E mamanan, tatanan y hasta e rumannan ta yama cu nan problema cu nan ser keri ta riba caya of ta bay sali for di KIA etc.
Si un persona cu mester yudansa no tin problema mental, nan no ta pone tempo pa su proceso di rehabilitacion. Un hende normal por bay dos aña den su proceso di rehabilitacion pa asina e por ta cla pa drenta bek den comunidad.
Tur dia tin e programa cu clientenan ta participa aden. Mainta tin meditacion y cada uno ta cana den su proceso. Despues por bay haci deporte eynan mes of bay den pool of gym etc y asina e dia ta bay trankilo. Jean Paul a splica cu bo ta mira e recompensa ora wak e cambio. E famianan y e persona mes ta keda masha agradecido y esey ta e bendicion pa bo sigui haci locual bo mester haci pa yuda esnan cu problema di droga.
E contacto entre e cliente y e famia ta keda constant. Cada uno tin su telefon y esey ta algo cu nan ta permiti. Mescos na Hospital bo por bay cu bo telefon, cerca Con Animo e mester ta mescos. Si haya sa cu bo ta haci combersacion telefonico cu ta trece risico p’e institucion y no recuperacion, nan ta kita bo telefon. Cada caso nan ta mire individualmente. Aruba ta keda un zona di riesgo hopi halto pasobra ora e bay bon e ta bay bon. Ora e bay malo e ta bay fatal, segun Jean Paul.
Na Corporacion Con Animo ta wak e persona di unda e ta bin y cual cambio ta necesario pa e persona haya un chens pa asina ta bon na su pais natal. Ta traha hopi riba e disciplina. Ora un hende caba cu su tratamento e mester bay bek y traha. Si na Corporacion Con Animo bo no ta cumpli cu bo orarionan manera mester ta, significa cu ora bo sali tampoco bo lo cumpli cu esaki.
Tur dia e cliente den rehabilitacion mester zorg pa su camber ta drecha, p’e ta baña y ta representabel. E leynan na Aruba awendia ta proteha e adicto mas cu loke ta saludable p’e adicto. Jean Paul v/d Kuyp a splica cu ley ta bisa cu bo no por obliga un hende cu ta pscicotico, cu ta horta y haci daño na su mes y na comunidad, kibra auto etc, pa oblig’e bay rehabilita. Esey kiermen cu e sistema mes ta proteha criminalidad pasobra e persona ta sigui cumpra droga y yuda e dealer cu droga. E adicto ta sigui kibra auto y sigui haci daño.
Esaki ta cosnan cu no ta make sense. Ley t’ey pa proteha nos como ciudadano y tambe e adicto como ciudadano. Nos mester cambia e ley unda ta obliga e adicto cu ta cay cera mas cu un biaha pa aña pa bay un rehabilitacion.
