Un di e proyectonan cu Minister di Asuntonan Economico mr. Geoffrey Wever a bishita na Scheveningen, tabata esun di Ferris Wheel. Un proyecto cu e compania a desaroya tin pensa pa introduci na Aruba tambe.
Ta trata di un wiel luhoso y grandi di SkyView Attractions Group B.V., construi specialmente como un atraccion turistico. E tin un altura di cincuenta meter.
Perry Oerlemans (CEO), SkyView Attractions Group B.V., a duna e minister di Aruba y su delegacion, un recorido na e atraccion turistico, cu den su shete aña di existencia a resulta sumamente exitoso y a percura pa bon entrada pa Scheveningen. “E ta algo cu nos ta masha orguyoso di dje,” ta loke cu e CEO di e compania a duna di conoce.
E compania ta interesa sigur pa realisa un proyecto asina na Aruba y e luga ideal lo por ta unda cu tin tiendanan existente, den area di Oranjestad. “Di e forma ey nos ta reforsa otro. E atraccion pa e area ey lo bira mas grandi y nos lo kier contribui na esey.”
Un reuzenrad, manera ta yam’e na Hulandes, tin 36 baki (den cual e hendenan ta sinta) y tin espacio pa seis adulto. Pa uno na Aruba, e ta kere cu lo tin 32 di e bakinan aki.
Ta papia aki di un inversion basta grandi, di algun miyon euro. E mes ta calcula casi 5 miyon euro.
E ta kere cu Aruba ta haya hopi turista y poniendo esaki na Oranjestad, e bishitante lo mester sali di nan hotel pa yega Oranjestad maske un dia, y e reuzenrad por hacie mas atractivo pa yega Playa, unda cu tur otro negoshi den e area lo beneficia.
E empresa ta spera di por realisa e proyecto aki mas lihe posibel na Aruba. Nan a bin ta trahando riba dje pa algun tempo caba y e bon ta cu tur hende ta entusiasma cu esaki. Na ta trahando riba e trapi caba, cu ta nifica un miyon euro di inversion.
Pa loke ta e sitio, a scoge Oranjestad, net patras di Renaissance Mall, unda antes tabata Helipad. For di eynan e ta duna un bunita bista riba henter e isla. A papia hasta cu Renaissance Resort y a sigura cu “we are here to stay” “Nos kier contribui na Aruba su turismo y esey ta pa un periodo hopi largo.”
