Diahuebs Instituto Hulandes pa Siguridad Publico (Nederlandse Instituut voor Publieke Veiligheid (NIPV) a transferi tres pomp mobil di emergencia y nan baki cu slang perteneciente, na Brandweer di Marina. Dentro di poco tempo nan lo bay pa Corsou y Aruba. E sistema di containernan HCP aki ta pa kazernenan di Marina riba e islanan. Pero Brandweer local tambe por haci uzo di nan na momento di inundacion. Brandweer di Marina y NIPV a firma e acuerdo di transferencia.
E pompnan mobil di emergencia por keda uza den un situacion di emergencia (eminente), durante e temporada di horcan, por ehempel na momento di un inundacion. E pompnan ta adecua pa pomp saca gran cantidad di awa.
“Riba islanan di Caribe nan no tin e sistemanan aki”, Comandante en Hefe Adhunto di Cuerpo di Brandweer di Marina, Twan Langenhuizen, ta bisa. “Esey tambe ta e motibo cu e instructornan di nos tambe ta bay cu nan. Nan lo bay instrui Brandweer local di ki forma nan mester opera e pompnan. Pa medio di e colaboracion aki nos lo tin eynan tanto e medionan como personanan cu por uza e sistemanan.”
Na Hulanda tambe Brandweer di Marina ta traha estrechadamente cu Brandweer Civil. Por ehempel durante coordinacion di e calamidad- y candelanan den e parti ariba di Noord-Holland.
Pantaya contra zeta y scuma contra candela
Sigun Langenhuizen e pompnan ta un parti di un pakete mas grandi di e recursonan cu ta bay e islanan di Caribe Hulandes. Pensa riba e pantayanan contra zeta y scuma contra candela. Pa medio di cooperacion cu e cuerponan di brandweer riba e islanan, nos por proteha e kazernenan miho sin cu mester manda personal eynan.”
Instituto di Conocemento
NIPV ta e Instituto di conocemento pa gestion di crisis y servicio di brandweer. E organisacion ta fortalece regionnan di siguridad, Reino y e otro socionan di crisis cu investigacion, educacion, informacion y apoyo.
