Pa bin cu e normal nobo, SVb tin un ekipo ps dirigi e regreso di trabou. E intencion ta pa duna training na diferente sector pa prepara nan p’e protocolnan y reglanan nobo cu mester cumpli cu ne. E team aki ta bou guia di dr. Myron Genser, kende a organisa diferente sesion durante e ultimo 2 simannan.
Pa sector publico a organisa 30 sesion, mientras pa sector di barberia y salonnan di beyesa a organisa 19 sesion. Ing. Edwin Jacobs, director di SVb a bisa di mira un compromiso grandi di e sector barberia y salon di beyesa. E ta un sector importante di Aruba. SVb a scoge e sector aki pasobra ta calcula cu mas di 95% di poblacion ta yega barberia of salon di beyesa pa ricibi e servicio ariba estetica. Ta importante p’e sector aki ta consciente di e reglanan y protocol.
Nan a responde enormemente y e participacion tabata masivo, pero un compromiso grandi di nan banda. SVb ta satisfecho cu esaki y ta duna confiansa cu e sector economico di Aruba tambe ta prepara pa funciona den e normal nobo. Asina aki ta minimalisa e contagio.
Haciendo un comparacion den e sectornan aki, por a mria cu e interes den sector publico no tabata mes grandi cu esun di sector barberia. SVb a prepara p’e sector aki 10 sesion, pero a termina cu 19 sesion. E prome 10 sesion tabata pa 10 persona pero a pone un maximo di 16 participacion. E sector aki cu ta hopi mas involucra den duna servicio directo na comunidad a mustra mas interes.
Sector publico tin algun reto cu mester cumpli cu ne, segun ir. Jacobs. SVb no a mira un consciencia den e leiding di departamento pa loke ta trata cumplimento di reglanan di protocol cu gobierno a stipula pa henter Aruba. Gobierno como dunado di trabou ta bay tin reto grandi. El a sigui bisa cu como dunado di trabou tambe ta yama pa cumpli cu e protocolnan, sino e ta bay hay’e den problema cu trahadonan. E consciencia ey SVb no a constata den e 30 sesionnan cu tabatin pa sector publico. Den e proximo simannan esaki ta bay bira un topico interesante, mirando e preguntanan cu ta yegando SVb.
Personalmente ta bin pregunta riba enfermedad cronico di trahado publico, esaki ta bay trece reto grandi pa gobierno. Aki ta trata ehecucion di protocol cu gobierno a declara aplicabel pa henter Aruba, inclusivo su mes. E reglanan di protocol general ta prescirbi cu bou tur circunstancia e distancia social di 1 meter y mey. Esaki ta nifica cu tin di organisa e espacio di tal forma y organisa schedule di tal forma pa por cumpli cu esaki tur momento. Oficinanan di gobierno ta yen di mas, no ta bay ta posibel cu tur hende por traha na mes momento. Aki no lo tin distanciamento social. Dunado di trabou tin un responsabilidad eynan. Un trahado cu ta sinti cu su dunado di trabou no ta cumpli cu e reglanan ey, tin derecho di keha. Esaki ta un regla declara pa henter Aruba y gobierno tambe tin di aplica e reglanan aki pa su departamento.
Tanten cu por aplica e reglanan di protocol den e grupo di riesgo, no ta existi ningun motibo pa no regresa trabou. Di tin enfermedad cronico no ta un motibo sin mas pa bisa di no por yega trabou den e normal nobo. Segun Ir. Jacobs, ta importante pa tanto e trahado di riesgo como esun di no riesgo cu na pia di trabou mester por cumpli cu e reglanan di protocol. SVb a haya hopi pregunta di hendenan cu ta cay den grupo di riesgo y bisa di no por traha, pero nan por traha den e normal nobo. Ta e dunado di trabou tin cu crea e condicionnan pa por funciona, pasobra por ehempel den un area di 5 meter pa 5 meter no por tin 8 trahado pero 2 of 3. Esaki ta nifica mester traha cu schedule. No por presenta na SVb y bisa di ta den grupo di riesgo y no por traha.
Ir. Jacobs su mensahe ta pa tur dunado di trabou, tur trahado tuma nota na e reglanan nobo di e normal nobo. Si mantene na e distancia social, labamento di man continuo, desinfeccion di area di trabou, ta garantisa cu den e sector economico e contagio bin den futuro lo ta minimo. Mantene na e protocol ta yega hopi leu pa loke ta trata un ola di contagio.
