Diadomingo anochi un violacion di trafico na rotonde di Tanki Flip a conduci na henter un show Policial na Paradera. Tur cos a cuminsa ora cu e homber L.M. biba na Paradera cerca su mayornan a pasa e rotonde di direccion contrario. Polis a reconoce riba e scooter. A dune un señal pa stop pero el a sigui direccion Tanki Leendert. E tabata bay direccion su residencia cu ta cas di su mayornan. E Polisnan riba caya a haya instruccion pa evita persecusion. Si nan sa kende e ta caba, evita peliger riba caya.
E unidadnan di Polis a bay na dos adres. A bay na e cas unda e ta biba y na cas di su pareha. Na cas di e pareha a baha busca su drechi pero no a topa cune. A keda tira bista na e cas tambe di e mayornan. E helicopter mientrastanto a señala e scooter riba e caminda banda di Caiquetio. Eynan a avisa e patruyanan cu a prepara pa su yegada na cas di e mayornan. Ora cu el a yega nan a acerke y den e discusion cos a bay for di man. E mayornan cu a mira henter e situacion pafo di tanto Polis contra nan yiu a core graba tur cos. E mayornan a haya cu ta un abuso nan a haci contra nan yiu.
E brommer tin tur su papelnan y nan ta sinti cu un control tabata suficiente. Dimes algun agente no a aprecia e grabacion y hasta kier a interumpi e grabacion cu e mama tabata haciendo. Asina mes e mama a keda insisti cu e ta riba su tereno y e ta graba loke e kier. Un otro persona na e sitio tambe Polis a bay riba dje y mande tera. E situacion no tabata facil y hasta refuerso a pidi na e adres na Paradera. Na final a hiba ambos persona deteni pa warda di Polis pa asina presenta nan dilanti un sub fiscal. E tata a mustra e polisnan e papelnan di e brommer for di prome instante y a hinca e scooter den cura. Djey un agente a bisa cu e lo confisca e brommer.
E mayornan no a haya cu esaki ta corecto. Nan a bisa Polis cu mescos cu cualkier otro control di trafico, nan a bay cu nan yiu y e vhiculo por keda atras. Esaki ta e procedura normal cu tur hende ta mira ultimo lunanan. Den e caso aki e Polisnan no kier a haci esaki y a bisa cu por bay chek na fiscal pa e scooter confisca. Tur esaki e mayornan a graba tambe. Na final varios unidad di Polis di diferente distrito den accion, helicopter den accion pa un scooter cu a pasa verboden na rotonde Tanki Flip. Ta basta energia Policial tabata tin pa algo asina chikito cu a pasa. Ta depende bo record, cierto Polis kier monta show riba bo manera a pasa Diadomingo anochi na Paradera.
