Mayor di ciudad di Doral, Christi Fraga, a keda impresiona pa e obra “Migrante” di e artista Venezolano, residencia na Aruba. “Migrante” ta bay bira un obra publico na e ciudad di Doral.
E logro di e artista Nelson Gonzalez pa pone un structura di brons dirigi na e migrante na e ciudad Doral (Florida), ta danki na e programa di Sister City cu Aruba tambe ta forma parti di dje pa hopi aña caba. Esaki a permiti e artista participa den un Open Call to Artist pa crea un obra como gesto di aprecio na e comunidad di migrantenan cu a funda Doral. Un obra cu a laga e Mayor di e ciudad hopi impresiona ora cu el a mir’e su dilanti prome biaha.
Recientemente e obra aki a yega Merca y tabatin un presentacion priva pa tur autoridad y instancia concerni. Aki nan tur por a admira e obra di algun meter halto y cu un peso di 1.8 ton (totalmente di brons).
Un di e personahenan presente tabata e mayor di ciudad Doral, Christi Fraga, kende a papia di e relacion cu tin entre Doral y Oranjestad basa riba e Sister Program, y cu a base di esaki e artista su obra “Migrante” a gana e seleccion.
“Nos comunidad,” Mayor Fraga a bisa na Mark-Benson Denz, director di Headlines Group, “ ta consisti di inmigrantenan. Y e obra aki ta bay bira algo masha simbolico den nos comunidad, pa tur esunan cu Doral ta nan cas awo.”
Waw y impresiona Mayor Christi Fraga a keda na momento cu el a drenta e area y a mira e escultura di brons cu ta pisa 1.8 ton. “Den mi mente a pasa “what an icon for our community”, el a conta. Ya caba e ta mira tambe con e hendenan ta yega e ciudad pa saca potret di e obra simbolico aki, cu ta ilustra famianan cu a bini for di rond mundo pa bin realisa nan soñonan aki.”
Falta algun proceso ainda pa finalisa, pero e funcionario ta spera cu por keda cla cu tur e papeleo pa final di mei of inicio di juni y di e forma aki instal’e na e sitio cu lo bira su cas.
Durante diferente combersacion na e evento aki, a constata cu gobierno di e ciudad ta promove hopi arte den areanan publico.
