Dia 24 di augustus Imelda Hof ta bay tin su feria, cuminsando di 3’or di atardi pa 8’or di anochi, cabando esaki cu un movie night. Segun e organisador di e feria, Gabriella Ras, loke pueblo por bay haya den e feria, ta 10 diferente wega, incluyendo e dunk tank.
Fuera di esey ta bay tin bendemento di artesania, benta di cuminda di Surinam y tambe Pizza Pizza cu e famoso pizza di maishi rabo. Tambe famia Kelkboom lo bin cu nan cuminda vegetariano. Ta bay tin diferente vendor di e farmer’s market.
Ta invita tur hende pa bin forma parti di e feria aki. Ta trata aki di dos dia di evento, esta dia 24 di 3’or di atardi pa 8’or di anochi y dia 25 di augustus, di 10’or di mainta te cu 5’or di atardi, unda cu tur hende por participa.
Kico por spera
Durante e feria aki ta bay tin hopi entretenimento. Segun Ras, tin un seleccion basta amplio pa hendenan por hunga y naturalmente famianan completo ta mas cu bon bini. Ta entretenimento cu pueblo, pa haci esaki algo mas grandi.
Tambe Cas Irena di Imeldahof lo ta habri den un openhouse, p’asina tur hende cu kier mas informacion por haya esaki y tambe tira un bista den e cas.
Cas Irena
Juffrouw Chela Lesire ta hoofdleidster di Cas Irena, na Imeldahof y ta splica cu Cas Irena ta un begeleidend pleeggroep. Aki e muchanan ta keda mas tempo den Imeldahof pa biba. E muchanan ta haci hopi actividad manera ballet, futbol, landamento, les di baila, etc. Danki na e feria cu ta bay ta recaudando fondo pa por drecha e murayanan gescheur di Cas Irena. Tambe nan lo drecha e bentananan y duna e cas un verf. Esaki ta pa e muchanan biba den un cas mas agradabel y pa nan sinti nan mes na cas. Cas Irena ta nan cas y tin di nan lo keda mas tempo den Imeldahof. E ora kier brinda nan algo cu nan ta sinti nan dushi cu nan por biba trankil na Imeldahof.
Den liñanan grandi, Cas Irena mester di mantencion. Actualmente tin 10 mucha bibando den e cas. Pero e capacidad ta pa 14 mucha.
Den e añanan cu Lesire ta trahando, tin hopi amigonan di Imeldahof cu semper a yuda cu cualkier cos, unda cu tin mester. Ta haci un apelacion na e amigonan aki pa nan aporte como tambe aporte di e comunidad, pa bin pasa dushi cu famia y alabes yuda pa un bon causa, pa asina por drecha e cas.
Pa mas informacion por acerca Gabriella Ras of yam’e na 5660108 of na Imeldahof mes na 5876085. Por puntra pa Natalia of Jenny y cu man habri nan lo ricibi donacion. Tur donacion ta mas cu bon bini, sea di compania of di pueblo mes. Lo ta tumando tur cos cu ta co’i hunga, paña prome cu feria te cu 6’or di atardi diabierna. Ta spera di tin e aporte y bishita di tur hende durante e dos dianan di feria.
