Riba un pleno diasabra anochi alrededor di 8:40 pm, husticia a detene un grupo peligroso cu ta envolvi den benta di droga y posiblemente arma tambe.
Cu autorisacion y presencia di fiscal di Ministerio Publico hunto cu Team di Aresto, K9 Unit, Narcotica, Flex Team y polis uniforma; a tene varios accion y entrada hudicial. Entre nan a bishita e skina cayente di Driemasterstraat cu Venezuelastraat. Un sitio conoci pa polis, no solamente pa benta di droga pero pa tiramento cu resultado fatal.
Husticia tabatin bista caba riba e persona cu ta na cabes y cu ta “run e show”. A yega cu un batayon di polis cara tapa y fuertemente arma. A cera nan di tur skina y pone tur hende “bay plat”, manera e cantica di Youth Extreme. E momento ey, no ta mira ken ta inocente of no, una bes bo ta frecuenta n’e skina cayente, sea ta busca pa cumpra droga of ta envolvi den e bendemento. Asina mes cos a bay tambe.
A pone como diesdos persona contra muraya y tapa nan wowo. Mesora a baha e cacho di K9 y demas polis p’asina cuminsa cu e buskeda pa droga. A busca tur rond, den mondi, den bar’i di sushi y hasta den cash’i coriente.
Despues di señala e sospechoso cu nan tabata busca, a bay over mesora na transporte den un vehiculo apart pa warda di polis na Shaba. E demas detenidonan a keda wowo tapa henter e rato mientras e buskeda tabata tuma luga.
https://www.facebook.com/24ora/videos/945611980575795
A rista hasta den e autonan para den cercania, pa cual a confisca un di e vehiculonan na final. Despues di e control, a laga mayoria di e personanan liber.
No a dura mucho cu e sospechoso na boei, a cuminsa canta manera lora den auto. Na dado momento, e recherchenan mes a bis’e: “ban suave.” El a cuminsa canta nomber, adres, auto y tur di su supuesto socionan cu tambe ta bende droga den cercania.
Despues di su cantamento, a ricibi autorisacion di fiscal y a bishita un di dos adres. A sigui pa Panamastraat, caminda cu a drenta cu team di aresto y detene un di dos persona. Den un transporte policial a sigui cu e sospechoso pa warda di polis.
https://www.facebook.com/24ora/videos/427415829653143
Awo e proceso di interogacion lo continua. Tabata henter un operacion cu a cuminsa for di orannan mas trempan, ora cu e teamnan special a topa na Veld di Aruba Juniors y djey sali pa “hit”. No ta yega “hit” sin cu ta sigur of por lo menos; casi sigur cu lo topa cu algo.
Polis tin un unidad special di observacion cu ta pasa diannan largo ta vigila un sitio of un sospechoso. Den auto civil, nan ta campa y mira; ki ora ta yega cas, ki ora ta move, den cua auto ta bandona y asina den algun dia, ya nan conece bo circulo di con bo ta move y asina ta duna “green light” n’e team arma pa yega y pone ordo.
Ta haci uzo di team di aresto na momento cu un sospechoso ta “vuurwapengevaarlijk”, pues cu e miedo cu e por tira na momento cu polis yega pa deten’e. Tur cos a bay segun planificacion y na final e fiscal, mr. Yolanda Pronk, a bay cas cu un smile riba su cara y hasta comenta prome cu subi auto: “Nada mas p’awe”.
