Na Guarda Nos Costa bou maneho di Trudy Hassel tin keto bay abuso ta tuma lugar. Esnan cu ta ilegal berdad mester bandona Aruba. Di otro banda a mira cu Guarda Nos Costa su espacio pa cera hende a bira mas bien un hotel of prison. Hendenan ta keda dianan, simannan y lunanan largo cera den Guarda Nos Costa sin un solucion pa nan bandona Aruba. Un costo di miles di florin cu ta sali for di caha di gobierno cu fondonan di pueblo pa duna nan di come y bebe tres biaha pa dia.
Den un caso specifico di abuso di poder, a sosode un caso caminda un mama naci na Venezuela y hopi aña na Aruba a ser gara pa GNC. E señora aki tin tres yiu. Uno adulto cu ta ilegal, uno di 13 aña naci na Venezuela cu tambe parce ta ilegal y otro criatura di 4 aña cu ta di tata Arubiano y ta naci na Aruba. E mucha di 4 aña tin paspoort Hulandes.
Ora a gara e mama a resulta cu su papelnan no ta 100% regla na DIMAS. Esaki segun e hefe di GNC. A cuminsa na duna e mama un meldplicht y tabatin su orario pa pasa firma di dialuna pa diabierna. E tabata pasa firma y sigui su caminda. Riba un dia ora a bin firma a tene cera. A bise cu e no por bay. Eynan henter e problema a cuminsa.
E mama a perde su libertad pa documentonan cu no tabata 100% na DIMAS y su yiunan menor a keda sin nan mama. Ningun caminda a mira presencia di e tata segun informacion cu nos a haya. Nos no conoce su paradero tampoco of su rol den henter e asunto aki. Cu otro palabra a kita e mama for di su yiu di 13 aña y otro di 4 aña cu paspoort Hulandes. Un mama cu tin un yiu cu Arubiano, e tin derecho di keda y haya su papelnan na ordo pa traha tambe y cria su yiu.
Despues cu e mama ta cera pa algun siman caba, instancianan a cuminsa capta tendencianan straño cu e yiunan cu a keda cas sin nan mama. Esey tabata un caso cu a pone autoridad mas halto cay aden. Nan a cuminsa investiga pasobra ta un abuso di poder y inhumano cu e hefe di Guarda Nos Costa ta ranca un mama for di su yiunan y laga nan sin cuminda sin cuido adecuado. E ruman grandi cu lo ta ilegal no por traha pa yuda tur dia e ruman di 13 y otro di 4 aña cu cuminda.
Ora cu esnan cu conoce e muchanan a cuminsa mira comportacion straño y inadecua di e criatura di 13 aña riba rednan social, un lus a cende y nan a cuminsa busca mas informacion. Asina a bin haya sa cu e mucha ta sin guia y a cuminsa bay den mal caminda. Prome cu algo mas serio sosode a actua. E asunto a yega te na Veiligheidshuis di Ministerio Publico.
Ora a analisa e caso serio aki a resulta cu e actuacion di e hefe di GNC tabata incorecto. A duna ordo mesora pa laga e mama den libertad pa e atende cu su yiunan.
Veilighieidshuis ta traha cu diferente departamento di gobierno pa asina atende cu situacionnan serio caminda hobennan ta envolvi. Esaki ta un caso cu a sosode recientemente.
