Awe diahuebs, manera cu tabata core rumor for di dialuna caba, awe durante un reunion cu e Hunta di Supervision nobo di N.V. Elmar, nan a informa nan Director General, Ing. Robert Henriquez, cu ta suspende pa 4 siman largo. E motibo ta mal maneho. Filomeno “Shon No” Maduro mes, e Presidente di e Hunta di Supervision di e compania, temporamente ta na timon di nos compania nacional di distribucion di coriente. Esaki despues di algun dia cu a nombr’e den e posicion aki.
N.V. Elmar a emiti un comunicado den cual ta bisa cu Hunta di Supervision a tuma e decision drastico aki debi na kehonan di mal maneho y iregularidadnan den e compania. Ta bin aserca keho di “secuestro” haci ma Landsrecherche y pa motibo di e intrankilidad bou di e trahadonan den e compania. Lamentablemente e Hunta di Supervision a tuma e decision sin papia cu e Director, sin scuche y sin investiga. Nan lo a haya sa cu e Director mes no a sinta cu e empleado sospecha di fraude, pues ta imposibel e secuestra un hende cu e no a reuni cune. Tambe cu e empleada mes a coopera cu e investigadonan, cu pa colmo tabata dos hende muhe tambe!
Pa e empleadonan di e compania, e decision aki a cay di sorpresa. A nota si un campaña formal di sindicatonan y di politica pa purba infiltra den e compania y specialmente den e maneho diario. Ora cu no a logra, a start un campaña pa desacredita e Director, un practica conoci como “Character assassination”.
E ultimo desaroyonan rond di e investigacion contra Mirlanda Maduro y Jenny Donata a acelera e proceso pa persigui e Director. E hecho cu e ta investigando posibel fraude y robo den cumpramento di material y servicio den ELMAR, parce di no ta aprecia pa doño di e compania, esta Gobierno. Probablemente afiliacion di e sospechosonan ta haciendo cu mester move mas lihe posibel di e funcion, pa por para e investigacion y evita persecucion.
Kico e Director suspendi lo haci awor, no ta conoci ainda. Probablemente e lo cana e mesun ruta cu Drs. Jerry Staring a cana na DVG, unda Minister Dangui Oduber a suspende sin motibo, pa cual Hues a destrui e decision pa suspende e Director. Pa loke ta e situacion na N.V. ELMAR, e forma aki no ta nobo y desconoci bou di e Gobierno di e mesun asignatura aki. Por corda con e tempo aya a persigui Alfred “Freddy” Rafini, a kit’e, pero mester a pag’e pa e bay. E tempo aya pa motibo cu e no kier a saca dividendo adelanta di e compania pa Gobierno, bou mando di Prome Minister Nel Oduber.
Ing. Robert Henriquez tabatin un funcion ehecutivo den Refineria Valero cu un carera impresionante. N.V. Elmar y WEB Aruba N.V. a habri espacio pa tuma un Director nobo na e companianan di utilidad y e tempo ey, na aña 2009, prome cu baha di su funcion, Prome Minister Nel Oduber a emplea Robert Henriquez (ELMAR) y Oslin Boekhoudt (WEB).
