“Nos kier e miho solucion pa Aruba y su hendenan. Pesey no a core bisa ‘si’ ni tampoco ‘no’ na e condicionnan cu Hulanda a pone na e yudansa financiero di tercer tranche. Aruba a scoge pa e caminda di dialogo manera hende grandi den cual ta pasa den tur condicion y na un manera sensato ta decifra ki consecuencia nan tin pa Pais y Pueblo”, asina minister mr. Xiomara Ruiz-Maduro a anuncia awe. E ta referi na e fiansa cu Gobierno di Hulanda mester atende pa Aruba, pero cu a mara na un lista di condicionnan.
“Pasobra cu tur respet, no kere cu e politico of e ambtenaar na Den Haag conoce e situacion economico y financiero di Aruba miho cu nos mesun profesionalnan na Aruba. Mester tene na cuenta cu hopi condicion ta fuera di proporcion pa e yudansa financiero cu ta wordo brinda na Aruba. Pesey no por djies firma y acepta un fiansa na condicionnan cu no ta cumbini Aruba”, segun e mandatario.
Diabierna ultimo mes Hulanda a dicidi di cambia riba nan mes e yudansa financiero cu mester a wordo duna pa 3 luna y amplia esaki pa 5 luna, brindando asina menos placa na fiansa pa luna y hibando nos Pais den un necesidad financiero aun mas grandi. “Claro na Aruba nos no por keda man crusa y warda. Nos ta wordo obliga di busca fondo di otro caminda y nos ta contento di por a haya e confiansa di inversionistanan institucionalisa y reconoci cu kier brinda Aruba e confiansa di un fiansa na condicion rasonabel”, di acuerdo cu minister Ruiz-Maduro.
“Nos ta haci un trabou na un manera responsabel y no ta bay laga nos Pais kibra nos dilanti. Esey ta nos responsabilidad y pesey nos ta spera di por haya e espacio necesario tambe pa por haci e trabou cu mester wordo haci na bienestar di henter Aruba“, asina minister Xiomara Ruiz a termina bisando.
