E construccion di un Taco Bell drive-thru nobo na Aruba mester keda para pa un tempo. Corte di Prome Instancia a schors dos permiso di construccion pasobra, segun e hues, nan tabatin defectonan serio. Gobierno mester tuma un decision nobo riba e oposicionnan di shete habitante.
E permit di construccion pa e restaurant a wordo duna na MIKA N.V. na september 2024. Na juli di e aña aki a sigui un permit modifica, entre otro pa motibo di adaptacionnan na e exterior di e edificio, riba peticion di esun cu tin e frankicia.
Shete habitante for di e area a indica di ta contra establecimento di un restaurant eynan. Nan ta biba banda di e tereno, riba otro banda di e tereno of na un distancia cortico y por haya molester directamente for di e restaurant.
Corte ta haya cu e plan di construccion ta surpasa e altura maximo permiti. Segun e Planificacion di Desaroyo Teritorial cu Reglanan, ROPV, pa e funcion comercial aki ta permiti un altura di construccion di mas tanto 4,5 meter riba e luga en cuestion. E plannan di construccion aproba ta bay mas leu. P’esey, segun e hues, e peticionnan di permit mester a wordo nenga.
Ademas, no a investiga si un drive-thru restaurant na e luga aki ta tene suficientemente cuenta cu e ambiente di biba. E ROPV ta pone como condicion cu un funcion comercial no mester ta un molestia pa casnan den e area cerca di dje. E habitantenan di e bario ta teme, entre otro, zonido, holo, luz y presion extra di trafico.
Corte a bisa cu otorgamento di e permisonan no a evalua si a cumpli cu e condicionnan aki. E hues a bisa cu esaki ta un falta grave y a conclui cu e permitnan no tabata prepara suficientemente cuidadoso y cu e motibonan no tabata suficiente.
Mester di conseho nobo
Tambe e conseho di e polis y e Comision di Bienestar a faya, segun corte. Polis di Aruba a duna un opinion riba un version anterior di e plan di construccion. Despues di esey, a move e entrada y salida for di e caminda principal pa un caminda na banda. Como cu esaki por tin consecuencia pa siguridad di trafico y fluho, mester a pidi conseho di polis atrobe.
E opinion positivo di e Comision di Bienestar tampoco tabata suficientemente basa. Un evaluacion anterior a revela cu e plan no tabata cumpli cu tur e rekisitonan urbanistico. Den un evaluacion posterior no a presenta ningun oposicion, pero segun corte no a splica dicon e evaluacion a cambia.
P’esey, e gobierno mester investiga di nobo si e plan di construccion ta cumpli cu e altura di construccion permiti y cu e reglanan pa funcionnan comercial den zonanan residencial. Tambe e Comision di Bienestar y e polis mester duna conseho di nobo.
Autorisacion otorga pa autoridad robes
Den e permit di construccion modifica, e hues ta constata un otro problema. Segun e Ordenansa nobo di Bouw en Afbraak, e Director di e Servicio di Trabou Publico mester dicidi riba un peticion pa un permit di construccion. Pero e minister a otorga e permit modifica.
Corte a bisa cu e minister no tabatin competencia pa haci esey. Segun hues, e defecto aki por wordo drecha durante e procedura di contesta.
Planifica pa habri na december
MIKA N.V. a declara durante e caso cu e tabatin un interes grandi pa continua cu e construccion. E intencion tabata pa habri e restaurant riba 15 di december. Ademas, segun e compania, tin e riesgo di perde e frankicia pa Taco Bell si e construccion no ta termina segun plan.
E hues ta haya cu e argumento ey no ta suficiente pa permiti e construccion sigui. E doño di e permit a cuminsa cu construccion, a pesar cu e tabata sa of por a sa cu habitantenan a opone, y a tuma su mes un riesgo dor di haci esey.
Como cu no ta conoci ainda si e localidad aki por wordo aproba pa un drive-thru restaurant segun ROPV, e interesnan di e habitantenan ta prevalece na e momentonan aki. P’esey e dos permitnan di construccion ta keda suspende te ora un decision nobo riba e obhecion ta wordo duna.
E minister mester tuma un decision nobo riba e obhecion contra e permit di construccion original dentro di seis siman. E apelacion di e habitantenan a keda confirma.
E tristo den e situacion aki cu ta e comerciante ta esun perhudica pa e situacion unda e departamentonan concerni di gobierno no a haci nan trabou debidamente. Algo cu por costa gobierno placa si e desaroyado dicidi di cuminsa un caso pa daño y perhuicio.
