Un estado di derecho fuerte ta depende di e confiansa cu ciudadano tin den gobierno y den e institucionnan encarga cu proteha su derechonan. Cu siguridad como un responsabilidad fundamental di gobierno y un derecho di cada ciudadano, parlamentario di AVP John Hart ta considera cu a yega e momento pa un debate amplio den parlamento tocante e estado actual y futuro di Cuerpo Policial Aruba (KPA).
Partiendo for di e principio aki, Hart a solicita un vragenuur cu Minister di Husticia, drs. Arthur Dowers pa obtene claridad y habri e debate parlamentario tocante e maneho, capacidad operacional y desafionan cu KPA ta enfrenta actualmente.
Segun Hart, e vragenuur por forma e base pa un debate mas amplio y fundamental tocante e rol di Cuerpo Policial Aruba den combate contra criminalidad, delincuencia hubenil y cybercrime, como tambe riba uzo di tecnologia, disponibilidad di personal, recursonan operacional y situacion financiero di e cuerpo.
“Nos Cuerpo Policial ta un di e pilarnan mas importante di nos Estado di Derecho. Tur dia, homber- y muhenan policial ta sali caya pa mantene ordo, combati criminalidad y proteha nos comunidad. Pero tras di e trabou cu nos ta mira diariamente, tin varios reto structural, entre otro falta di personal y recursonan. Na mes momento, tin diferente asunto cu ta exigi direccion y decision politico”, Hart a enfatisa.
E parlamentario di AVP ta pidi claridad tocante e accionnan concreto cu gobierno ta tumando pa fortalece capacidad operacional di KPA y garantisa cu e cuerpo tin suficiente recurso humano, financiero y tecnico pa atende debidamente cu e demanda existente.
Durante aña parlamentario 2025–2026, Parlamento a reuni cu Minister di Husticia pa trata, entre otro, capacidad di personal den recherche, denuncianan cu posiblemente no ta trata of cu ta enfrenta atraso significativo, e motibonan tras di e retraso den casonan y e impacto cu esaki por tin riba victima y otro ciudadanonan cu ta busca asistencia di autoridad.
“Como parlamentario, mi ta considera importante pa haya claridad tocante e situacion actual y e direccion cu gobierno ta tumando pa garantisa cu ciudadanonan ta ricibi e proteccion y atencion cu nan merece”, Hart a declara.
Cu e vragenuur solicita, Hart ta busca un evaluacion transparente di e situacion actual y un splicacion cla di con gobierno ta atendiendo cu e retonan cu por afecta investigacion y maneho di denuncianan na Aruba. Ademas, e ta desea sa cua medida lo implementa pa evita atraso, mehora capacidad investigativo y fortalece servicio na ciudadano.
“Transparencia y dunamento di cuenta ta esencial pa mantene confiansa den nos institucionnan democratico. Siguridad di pueblo merece un debate serio, informacion completo y accion concreto”, John Hart a conclui.
