Recientemente algun studiante di Universidad di Aruba a haci anuncio di un proyecto cu nan ta recoge donacion (regalo) pa muchanan cu nan mayornan, door di e pandemia, no por duna nan un regalo.
Na momento cu gerencia di Hua Hing Food Center, cu a habri recientemente na Meiveld, a tende di e proyecto a dicidi di saca un man pa yuda e comunidad.
Hua Hing Food Center a haci un donacion di 125 regalo pa contribui na e proyecto cu studiantenan tin ta ehecutando di “Save A Smile This Holiday Season” hunto cu Fundacion Pa Nos Comunidad, pa colecta regalo y entrega esakinan na muchanan pasando den necesidad.
E proyecto aki ta bou guia di Aïsha Romero y Alexandra van Norden.
E grupo di studiantenan di Universidad di Aruba ta hopi agradeci cu Hua Hing pa e contribucion masha grandi aki y pa a duna un man den un tempo unda ta hopi dificil pa contribui. Apesar di e situacion, nan a dicidi di saca un man pa yuda.
E hobennan ta desea gerencia di Huan Hing hopi exito cu apertura di nan supermercado nobo.
Diasabra mainta e hobennan a bay na Club Kibrahacha unda cu a cuminsa pa reparti e regalonan cu a ricibi.