Taxistanan cu si tin cu paga impuesto y tur otro gasto pa por tin un permiso y pa por mantene nan vehiculo den bon condicion, ta sinti cu Gobierno y instancianan ta laga nan na caya den controla pa evita e fenomeno di taxi pirata. Esey ta personanan cu ta “hunga taxi” den forma ilegal.
Asina awe diadomingo mainta, un huesped na Talk of the Town Hotel a check-out y a pidi pa un taxi hib’e aeropuerto. E empleado di e hotel, un Hulandes-Europeo, a opta pa cana bay na e oficina di car rental den e hotel y a bisa e persona eyden cu e tin guest pa hiba aeropuerto.
Consecuentemente, e empleado di e car rental ta subi su auto personal, busca e huesped dilanti hotel, pasa dilanti tur e taxistanan para eyfo wardando un oportunidad pa haya un servicio. Claro cu e practica aki ta lanta rabia bou di e taxistanan pasobra ta sinti cu e hotel mes ta competi cu nan di forma inhusto y na otro banda, Gobierno y instancianan ta man crusa pa defende interes di nos taxistanan.
Por lo menos un grupo di taxi no a sconde nan disgusto riba red social, exponiendo auto di e empleado di hotel of car rental cu a horta un trabou di nan awe mainta na Talk of the Town Hotel. Taxistanan a acorda cu nan lo sigui expone tur esunnan, cu den forma ilegal, ta competi inhustamente contra taxinan. Si bo kier “hunga taxi”, paga bo number di auto mas caro, paga un seguro hopi mas caro, paga pa subi tereno di aeropuerto, laba auto casi tur dia, etc., anto e ora lo bo sa cuanto gasto un taxista tin pa por brinda servicio na su pasaheronan.
