Locual hopi tabata teme, awor aki parce ta birando un realidad y ta hinca nos hospital den un situacion dificil operacionalmente. Cambernan disponibel pa pashentnan di Covid ta yenando y specialmente e unidadnan disponibel den e seccion di cuido intensivo (ICU) tambe ta yenando. Cu e realidad ey na mente, ta buscando urgente pa extra nurse, dokter y pa tin menos pashent posibel eyden. Pa logra esey, a cuminsa manda pashentnan cu no ta di Covid, pero ta interna den ICU, pa bay Colombia y sigui nan tratamento eynan.
DVG a informa awe cu tin 23 pashent interna den Dr. Horacio E. Oduber Hospital, di cual 4 ta den cuido intensivo, 18 riba piso general y 1 riba piso di maternidad. Parce cu di e 23 pashentnan interna, 21 no a vacuna. Pues ta 2 pashent so a haya vacuna y ta interna, pero no den cuido intensivo. E moral di e storia ta cu mayoria di e pashentnan den hospital, ta pertenece na e grupo cu ta nenga di vacuna pa e virus aki.
Awe mes Hospital a manda informa su trahadonan cu nan ta nota un crecemento enorme di pashentnan e ultimo siman aki. Manera cos ta bayendo aki, lo no tin suficiente cama ni trahado pa maneha e pashentnan. A pidi e compania AMI di Merca pa bolbe manda dokter y nurse pa yuda Aruba, pero ainda no ta sigur si esey ta posibel. Entretanto lo pidi e trahadonan di Aruba mes pa traha overtime, basa riba pago adicional, pa yena e buraco cu tin den personal.
E ultimo dianan, cu e cantidad di accidentenan cu tabatin, a haci cu e unidad di cuido intensivo a hay’e cu pashent adicional cu no ta contagia cu Covid. Como tal, e dokternan ta den contacto diario cu Colombia pa por manda e pashentnan aki eynan, pa habri espacio den ICU pa pashentnan di Covid cu mester tratamento specialisa, na mashin di hala rosea. Ta premira cu den e siman cu ta bin lo yega mas pashent malo cu mester bay riba mashin, pero cu awo ta casi imposibel pasobra luganan ta ocupa.
E conseho ta sigui pa ciudadanonan vacuna, pasobra mas tarda pa tuma e vacuna, mas e chens ta pa contagia y bira malo. E problema cu tin awor pa bira malo ta cu hospital ta yenando y Aruba no tin e cantidad di nurse y dokternan specialisa den cas pa brinda cuido. Esey ta un tendencia peligroso pa e mesun pashentnan aki. Teniendo cuenta cu mas di 91 porciento di e pashentnan interna awo cu Covid no ta vacuna, ta un señal cla…cu pa awo…vacuna ta e unico salbacion!
