Den e “heat” di e accion siman pasa na hospital tabatin varios expresion menos bunita a cay. Esaki sinembargo mester pone nan un banda y sigui na mesa, ta loke cu Jacco Vroegop, director di Hospital y Presidente di Hunta di Directiva di dr. Horacio Oduber Hospital a duna di conoce. Pero tambe el a trece dilanti cu no por negocia nada tanten cu nan no sa di AZV cuanto placa nan ta haya pa nan presupuesto.
Sindicato ABV ta pidi, den nomber di su miembronan, pa pone un paro na e 5% di reduccion di salario.
Vroegop a bisa cu su pensamento ta cu semper mester sigui combersa cu otro y esey a sosode hopi siman pasa. No a caba cu e reunion y mester discuti diferente tema ainda. “Pero mester keda profesional y hunto lucha pa hospital, e trahadonan y pa e pueblo. Cu ABV a palabra cu lo sigui den combersacion y percura pa haya informacion di kico lo ta e reduccion di e placa cu hospital ta haya y mientrastanto e palabracionnan den CAO ta keda valido.
El a sigura cu ta nan para pa nan trahadonan y no ta traha contra di nan, y lo para hunto cu ABV pa nan derechonan.
Hospital ta en espera di un contesta di AZV di con grandi e presupuesto pa hospital lo ta. Esaki ta importante pa sa ki tipo di cuido por ofrece y si mester bisa e personal cu nan lo mester entrega un parti di nan salario atrobe. Ayera a manda un carta pa AZV pidiendo pa claridad mas lihe posibel, pasobra hospital di su banda mester duna claridad na tur esnan cu nan ta traha cu nan tambe. A pone un deadline pa diabierna. Despues lo bay papia cu ABV.
