Ayera nochi a tuma luga e simposio “The Road to Good Governance II” den e Ballroom di Paseo Herencia, cu oradornan manera Presidente di Banco Central, Jane Semeleer, Prome Minister, Evelyn Wever-Croes, Lider di fraccion di MEP, Rocco Tjon y tambe Procurador General mr. Alex van Dam. Universidad di Aruba den colaboracion cu Fundacion pa Gobernacion di Calidad Aruba, a organisa e evento aki y por bisa cu e tabata un exito rotundo.
Aña pasa a cuminsa explora e forma con Universidad hunto cu e Fundacion por cera cabes cu e meta pa stimula tur hende pa cuminsa dialoga, discuti, debati, pero tambe actua pa por persigui, purba di yega na bon gobernacion.
Rector di Universidad di Aruba, mr. dr. Glenn Thode, a splica cu aña pasa na September, a organisa un prome simposio enfoca riba trabao academico rond di bon gobernacion. E biaha aki a pensa cu lo ta bon pa continua cu e proceso.
Esnan cu mester a trece algo dilanti, den comunidad den e dialogo, lo tabata e hendenan cu ta carga un cierto responsabilidad, mara na nan tarea y nan tin un rol den e checks and balances. E structuranan den gobernacion, cu ta suppose di garantisa calidad den gobernacion.
Esaki naturalmente tin e hendenan den e funcion mes, ta bon pa laga nan trece p’adilanti con nan ta mira cu den nan funcion, nan como persona por duna contenido na e rol ey pa nan tarea pa no solamente goberna, pero goberna bon.
No solamente percura pa tin un gobernacion, sino percura pa tin bon gobernacion. Pa e motibo ey a busca e figuranan hopi importante. Tabata tin diferente, pero a scoge e ora pa invita presidente di Banco Central di Aruba, kende ta sra. Jane Semeleer. E ta e prome presidente femenino. Ultimo biaha den e simposio un di e presentadornan cientifico a bisa, cu hende muhe tin di bay hunga un rol importante den mundo, den e proceso di yega na bon gobernacion.
Ta hopi bon cu na Aruba nos tin ya caba a tuma e pasonan aki. Tabata tin gana pa e presidente di Banco Central eynan comparti con nan ta mira nan rol. Nan ta salbaguardia nos florin Arubiano, pero tambe e integridad di e sistema y structuranan financiero di nos pais.
Ta cosnan cu ta garantisa, no solamente e balor di nos florin, pero indirectamente balor di nos trabao. Trabao di cada cos cu nos a produci riba e isla aki. A haya ta importante pa scucha con e rol di Banco Central ta keda uno den cual cu ta sigui riba e caminda di bon gobernacion.
Di dos persona cu a invita y a acepta, tabata nos prome minister, kende ta e prome minister femenino di Aruba. Naturalmente ta sumamente contento cu a comparti su pensamento riba con gobierno y bao di su liderasgo en especial, ta cana riba e caminda di bon gobernacion y integridad.
El a trece padilanti e pasonan cu nan ta tuma berdad, pasobra cu ta e prome gobierno na Aruba, cu tin como prome liña den nan programa di gobernacion, integridad, bon gobernacion y transparencia, cosnan asina. A mira cu ya caba nos ta riba e caminda ey.
Thode a sigui splica cu a pidi dos persona, dos representantenan di e dos partidonan grandi cu tabata domina nos parlamento desde cu nos a bira pais den Reino, desde Status Aparte. Un di nan a acepta, cual tabata sr. Rocco Tjon, cual ta lider di fraccion di e partido mas grandi den e coalicion actual. El a trece padilanti e rol di parlamento riba e caminda aki.
Como ultimo cu tabata tin, cu a acepta e invitacion, ta sr. Alex van Dam, cual ta procurador general y cu a bin trece p’adilanti con e rol e ora di e cadena rond di mantene leynan rond di criminalidad, con esaki ta funciona, kico nan rol ta y tambe bo ta mira cu mundialmente tin hopi persecucion di hendenan cu ta mal usa nan poder publico pa metanan priva.
Na final, tanto Thode, como representante di Universidad di Aruba, a trece padilanti ki reaccion lo tuma den 2019 y tambe sr. Armand Hessels, kende ta representa e funcaion di Gobernacion di Calidad na Aruba, a trece padilanti ki pasonan e lo tuma den 2019. Ta sigui asina busca sinergia pa nos comunidad, actua riba e caminda aki. A yega na un conclusion, segun Thode. A resona den tur hende nan charla, tabata cu bon gobernacion ta cuminsa den e paden di nos tur. Tin caba, hunto cu e fundacion mes, pero tambe cu diferente facultad den Universidad, cu ta bay tin un serie di charla cu lo anuncia mas despues. Tin cu wak con ta organis’e exactamente.
Ya caba tin manera un programa, pero ta continua pa traha e programa pa full un aña. Den otro palabra, lo bay ta un aña di charla cu lo enfoca riba e tema aki.
Na Universidad lo lanta un instituto di bon gobernacion y liderasgo, di modo por keda enfoca riba esaki durante e aña. Ta bay tin dos profesor cu lo bay enfoca riba esaki y eleva e resto di calidad rond di gobernancia na Aruba. No solamente publico, pero tambe den sector priva.
Banda di esey ta sigui busca colaboracion. Bon gobernacion ta un tarea di comunidad. Tin cu colabora cu mas tanto actornan posibel den comunidad. Por ehempel un Camara di Comercio, Organisacion di trahado, organisacion di dunadonan di trabao, sindicatonan. Ta pasonan cu tin cu tuma y lo tuma nan tambe e aña aki.
Thode a menciona cu e gobernacion awor aki, ta un gobernacion cu tin cu coregi algun cos. Tin ya caba 33 aña, bayendo pa 34 aña den nos Status Aparte. Si bo mira e trekker record di nos gobiernonan te ainda, tin hopi bon cos a pasa, pero tin un issue cu ta preocupante. Esey ta cu continuamente nos gobiernonan ta crece. Esaki ta un peso pa e comunidad carga y no ta crece den eficiencia. E ta crece den cantidad di trahado.
Eynan mester reahusta, y mester coregi. Banda di esey tambe, e manera cu a maneha fondonan publico, no a carga hopi aprobacion di supervisornan pa mira ki ora ta haci finansas publico saludabel y duradero. Kiermen esaki ta un punto cu tambe mester coregi. Esaki ta un gobierno cu a mira su mes dilanti un reto pa bin cu coreccion.
E prome minister a menciona e reformanan fiscal. E tin e tarea ey pa haci. Thode a nota cu algun di e pasonan ey a wordo tuma. E anochi a trece dilanti cu lo tuma paso pa bin cu un bureau y otro organisacionnan cu lo continua pa eleva e integridad den nos gobierno. Pasonan importante ta wordo tuma actualmente, Thode a menciona.
