Diabierna den oranan di atardi Polis a wordo manda cu urgencia na altura di Boca Grandi. Esaki ta e área pariba di KIA. E informe cu a drenta ta cu tin un hende herida na costa.
Ora cu Polis a yega a topa dos unidad di ambulance. E paramediconan mes no por a yega na e costa unda e víctima tabata. Un ciudadano a duna un man cu su pickup 4×4. A logra pone e víctima den baki y trece más cerca di ambulance pa dune asistencia. E tabata tin un corta serio na su man. Haciendo investigación a resulta cu ta un Homber Hulandes. E Homber for di e día anterior a sali for di cas. E tin problema matrimonial.
E Famia a confirma tambe ora Polis a bay notificanan di e situacion. Polis a haci investigacion caminda a topa cu un auto tambe. Den e auto a haya yabi pero tambe un carta cu despedida. Eynan a confirma cu e persona tabata depresivo y kier a tuma un decision drástico pa cu su bida. A bay cune Hospital mesora den ambulance. E tabata na tino pero basta bati y descontrola.