Recientemente hospital a celebra siman di Hulpverlening Team (HVT). Desde aña 2006 tin un bedrijfhulverleningsteam di hospital y desde e tempo ey tur aña ta purba haci un siman pa reconoce HVT su bon trabou.
Durante henter e siman ta haci diferente tipo di training, charla y actividadnan recreativo pa asina duna reconocemento na esnan cu t’ey na momento di
un calamidad, asina Manager di beveiliging di hospital, Milka Wernet a duna di conoce. Director di cuido di hospital, Ezzard Cilié a duna pabien na e miembronan nobo di e Medisch Actie Team (MAT) cual a huramenta y a ser instala durante e opening oficial di e siman aki. E miembronan di MAT por duna asistencia medico na esun cu mester di dje na momento cu tin incidente riba tereno di hospital. Frans Figaroa presidente di comision di calamidad di hospital, a expresa su entusiasmo pasobra Hospital tin pa 11 aña HVT y desde awo tambe un Medisch Actie Team (MAT) y esaki ta un adelanto grandi pa Hospital. El a sigui elabora cu hospital ta prepara pa calamidad y esaki ta algo cu ta bin repentino. Pa esaki mester percura cu tur cos ta up to date pa asina handle calamidad. Frans Figaroa a curasha e personal di HVT y MAT pa tuma nan tempo pa conoce e espacio di New Bed Tower y e plan di calamidad pasobra ora tin un calamidad hospital ta depende riba nan.
A duna reconocemento na diferente persona cu di un of otro manera a sobresali durante e aña aki cu ta: – HVT Manager di aña cu a keda den persona di sra. Ruthmila Odor-Croes – HVT Rookie of the year cu tabata sr. Francis Figaroa – Heroe di HVT di aña 2017 cu a keda den persona di sr. Sjaak Koeten – HVT di aña 2017 a keda den persona di sra. Ronneke Kats E siman di HVT di Hospital a clausura cu un evento recreativo na Splash Park, cu a carga e nomber di “HVT Games”. Aki e miembronan di HVT y coleganan di HOH a bini hunto y a competi den diferente actividad pasando un momento ameno. Manager di beveiliging di hospital, Milka Wernet a duna di conoce cu nan kier a bin cu un actividad special pa crea mas conexion den team. Na e evento di HVT Games tabatin presente 12 departamento cu tabata competi cu otro unda tabatin 3 wega riba lama y 3 wega riba tera. Cada team tabata consisti di 8 participante y tabatin 96 persona total cu a participa. Pa prome biaha tabatin un actividad asina varia y tur hende a disfruta di e clausura unico aki.
